2010 va 2020-yillar, shubhasiz, filmlar tarixiga sikvel va prikvellar davri sifatida kirdi. Ammo shu bilan birga, aynan shu davrda rekord darajadagi mashhur filmlarning muvaffaqiyatsiz davomlari to‘lqini paydo bo‘ldi.
“Joker”: Birinchisi — 1,079 mlrd, ikkinchisi — 204 mln dollar
2019-yilda Todd Filipsning “Joker” filmi jahon prokatidan 1,079 milliard dollar daromad oldi. Byudjet atigi 70 million dollar bo‘lganini hisobga olsak, muvaffaqiyat juda katta edi. Film IMDb’da 8,4 ball bilan barcha davrlarning eng yaxshi filmlari ro‘yxatiga kirdi.
2024-yilda “Joker: ikki kishilik telbalik” 200 million byudjetga ega bo‘lib, atigi 204 million dollar mablag‘ to‘plagan. Film reytingi — atigi 5,3.
“Kapitan Marvel”: Birinchisi — 1,31 mlrd, ikkinchisi — 206 mln dollar
“Kapitan Marvel”ning birinchi qismi “Qasoskorlar”ning muvaffaqiyati to‘lqinida 2019-yilda chiqdi va 1,31 milliard dollar ishlab topdi. Kartinaning byudjeti 175 million, reytingi esa 6,8 edi.
Ikkinchisi esa butunlay boshqa sharoit — tomoshabinlar superqahramonlik hikoyalaridan charchagan koviddan keyingi 2023-yilda ekranlarga chiqdi. Film hammaning hafsalasini pir qildi — ijodkorlar 219 million dollar byudjetdan 206 million dollar daromad oldi. Filmning reytingi — 5,5.
“Alisa”: Birinchisi — 1,025 mlrd, ikkinchisi — 299 mln dollar
2010-yilda “Alisa mo‘jizalar mamlakatida” filmi muvaffaqiyatidan multfilmlarning ommaviy ravishda filmlarga aylanishi va sevimli klassik kartinalarning yangi versiyalarini yaratish to‘lqini boshlandi. 200 million byudjet bilan film 1,025 milliard dollar ishlab topdi. Uning reytingi — 6,4.
Filmining ikkinchi qismi “Alisa ko‘zgu ortida” 6 yildan so‘ng chiqib, muvaffaqiyatsizlikka uchradi — 170 million byudjet bilan film jahon prokatida atigi 299 million dollar to‘pladi. Reyting — 6,2.
“Akvamen”: Birinchisi — 1,152 mlrd, ikkinchisi — 434 mln dollar
2018-yilda “Akvamen”ning chiqishi omadli bo‘ldi. 200 mln byudjetli kartina 1,152 mlrd ishlab oldi. Reyting — 6,8.
Filmning uzoq kutilgan davomi esa 2023-yilda chiqdi va unchalik muvaffaqiyatli bo‘lmadi. 215 million byudjet bilan film jahon prokatida 434 million dollar yig‘di. Reyting — 5,6.
“G‘aroyib ayol”: Birinchisi — 824 mln, ikkinchisi — 170 mln dollar
“G‘aroyib ayol” 2017-yilda ayol qahramonlar va ayol rejissyorlarni yangi bosqichga olib chiqadigan shov-shuvli voqea sifatida e’tirof etilgan. Kartina 150 million dollar byudjet bilan 824 million dollar ishlab topdi. Reyting 7,3 ballni tashkil etdi.
Davomi 2020-yilda chiqdi va muvaffaqiyatsizlikka uchradi. 200 million byudjetli film 170 million dollar ishladi. Reytingi — 5,4.
“Jodu saltanati”: Birinchisi — 814 million, uchinchisi — 407 mln dollar
2016-yilda chiqqan birinchi filmning prokat ko‘rsatkichlari biroz yaxshi edi — 814 million, byudjet esa 180 million dollar. Filmning reytingi — 7,2.
Biroq ikkinchi qism deyarli 200 million dollar kamroq — 654 million dollar ishlab topdi. Uchinchisi esa 200 mln dollarli byudjet bilan atigi 407 mln daromad qildi. Reyting — 6,2. Rejalashtirilgan yana ikkita film bekor qilindi.
“Matritsa”: Ikkinchi — 742 mln, to‘rtinchisi — 156 mln dollar
“Matritsa”ning birinchi va uchinchi qismlari ijodkorlariga 400 mln dollar foyda keltirdi. Ikkinchi qism esa eng muvaffaqiyatli bo‘ldi — 2003-yilda u 150 million byudjet bilan 742 million dollar ishlab topdi. Birinchi qismlarning reytingi 7 balldan pastga tushmadi va trilogiya kult filmga aylandi.
2021-yilda butun dunyo hikoyaning davomini qiziqib kutdi. Biroq “Matritsa: Tirilish” rekord darajada yomon chiqdi. Film 190 million dollar byudjet bilan 156 million dollar ishlab topdi. Reyting — 5,6.
Izoh (0)