AQSHning Viskonsin shtatida bedarak yo‘qolishi uyushtirilgan deb hisoblangan ota o‘zbekistonlik ayol bilan aloqada bo‘lgani va g‘oyib bo‘lishdan oldin hayotini sug‘urta qilgani aniqlandi. Bu haqda People xabar berdi.
Politsiya ma’lumotlariga ko‘ra, oilasi va huquq-tartibot organlari Ryan Borgvardtni avgust oyidan beri ko‘rmagan. O‘shanda Grin Lake okrugida uning avtomobili va treyleri topilgan. Hududda o‘tkazilgan qidiruv davomida ag‘darilgan qayiq aniqlagan. Qidiruvdagilar ko‘lda Borgvardtning baliq ovlash qarmog‘i va qutisini topgan, quti ichida yo‘qolgan erkakning guvohnomasi ham bo‘lgan.
Uylangan va uch farzandi bo‘lgan Borgvardtni 54 kun davomida qidirishgan, jarayonda qidiruv itlari va g‘avvoslar guruhi ishtirok etgan. Ammo oktyabr oyida qidiruv boshqa yo‘nalishda davom etgan. Politsiya Borgvardtni yo‘qolgan deb e’lon qilgach, Kanada huquq-tartibot organlari uning ismini qidirgani aniqlangan.
Biz buni kutmagan edik, deydi sherif Podoll.
Borgvardtning noutbuki tekshirilganida undagi qattiq disk almashgani va erkak g‘oyib bo‘lgan kuni internet-brauzer tarixi o‘chirilgani ma’lum bo‘lgan. Keyinroq ma’murlar Borgvardt pasportini suratga olgani, pul mablag‘larini xorijiy bank hisobiga o‘tkazgani, elektron pochtasini o‘zgartirib, O‘zbekistondagi ayol bilan muloqot qilganini aniqlagan.
G‘oyib bo‘lishidan bir necha oy oldin Borgvardt 375 ming dollarlik hayot sug‘urtasini amalga oshirgan.
Yangi dalillarning paydo bo‘lishi tufayli Rayan bizning ko‘lda emasligiga amin bo‘ldik, deydi Podoll
Huquq-tartibot organlari hozirda yo‘qolgan ota “Yevropaning biror joyida” ekaniga ishonmoqda. Podoll ko‘ldagi qidiruvlarga yordam berganlarning barchasiga minnatdorlik bildirgan.
Ular otalarini cho‘kib ketgan deb o‘ylashgan ekan. Bir kun oldin esa uning tirikligini bilib olishdi, dedi Podoll Borgvardtning farzandlari haqida.
Sherif erkakning rafiqasiga ham minnatdorlik bildirib, uni “juda kuchli ayol” deb atadi va bedarak yo‘qolgan Borgvardtga murojaat qildi.
Ryan, agar bu xabarni ko‘rayotgan bo‘lsang, iltimos, biz yoki oilang bilan bog‘laning. Turli vaziyatlar yuz berishi mumkinligini tushunamiz, ammo oilangiz otalari qaytishini istayapti, dedi u.
Izoh (0)