Bolalikdan tanish bo‘lgan mandarinning ta’m va ifori doimo yoqimli xotiralarni uyg‘otadi va yaxshi kayfiyat bag‘ishlaydi. Mandarinlar ko‘pchilik uchun sevimli qishki meva bo‘lsa-da, ko’plab insonlar uning aynan shirin navini yaxshi ko‘radi. Quyida ushbu sitrusni tanlash qoidalari va nordon mandarinni qanday qilib shirin qilish bo‘yicha tavsiyalarni keltiramiz.
Mevalarni to‘g‘ri tanlash
Nordon mandarinlarga yo‘liqmaslikka birinchi qadam ularni farqlay olish va to‘g‘ri tanlashdan boshlanadi. Avvalo, mevaning tashqi ko‘rinishi: rangi, po‘stining tuzilishi va xushbo‘yligiga e’tibor berish kerak. Yaxshi yetilgan mandarinlar to‘q olovrang tusga ega bo‘ladi va po‘sti osonlik bilan archiladi. Mevani yengil bosganda undan mandarinning isi birdan taraladi. Juda qattiq, och sariq va yashil aralash rangdagi mevalar nordon bo‘lishi mumkin.
Termik ishlov berish
Mandarinlarning nordon ta’mini kamaytirishning oddiy usuli isitishdir. Meva bir necha daqiqa davomida iliq suvga solinishi yoki radiator kabi issiqlik manbai yaqinida saqlanishi mumkin. Issiqlik meva ichida sodir bo‘ladigan jarayonlarni tezlashtirishga yordam beradi. Bunda mandarindagi shakar miqdori oshadi va nordonlik kamayadi.
Boshqa mahsulotlar bilan birga iste’mol qilish
Mandarinlarning nordon ta’mini ularni boshqa mahsulotlar bilan birgalikda iste’mol qilish yo‘li bilan kamaytirish mumkin. Masalan, banan yoki olma qo‘shilgan mevali salatga mandarin bo‘laklarini solish orqali uning ta’mini muvozanatga keltirish mumkin. Shuningdek, mandarinlarni shirinliklar tayyorlash uchun masalliq sifatida ishlatish mumkin.
Mandarin murabbosini tayyorlashda uning nordon ta’mini kamaytirish uchun murabboga bir chimdim iste’mol sodasini qo‘shish yordam beradi. Yana bir usul — mandarin bo‘laklarini shakar bilan qovurib, karamelga aylantirish mumkin.
To‘g‘ri saqlash
Mandarinlarni saqlash usuli ham ularning ta’miga ta’sir qiladi. Mevani o‘ta past haroratda saqlash uning yanada nordon bo‘lishiga olib keladi. Mandarinlarni saqlash uchun optimal harorat 3 dan 8 darajagacha issiqdir. Bunday sharoitda mevalar o‘z ta’mi va xushbo‘yligini yaxshi saqlab qoladi.
Izoh (0)