Tarixda o‘chmas iz qoldirgan sevimli sovet filmlarini qayta-qayta ko‘rganda ziyrak tomoshabinlar ilgari hech kim payqamagan turli xatoliklarni aniqlaydi. Bunday filmlardagi xatolarga har kimning munosabati har xil. Ba’zilar darhol rejissyorlarni e’tiborsizlikda ayblay boshlasa, boshqalar buni sevimli filmini qayta ko‘rish uchun yana bir sabab deb tushunadi.
“Ishdagi ishq”
Verochka va Lyudmila Prokofyevna zamonaviy ayol qanday bo‘lishi kerakligi haqida suhbatni davom ettirish uchun ofisdan majlislar zaliga o‘tishi bilanoq, Verochkaning tirnoqlaridagi lak yorqin qizildan tilla rangga o‘zgaradi.
Shunga o‘xshash hodisa Samoxvalovning galstugi bilan ham sodir bo‘ladi: avvaliga Samoxvalov Kalugina bilan tanishish uchun uning xonasiga kirib kelganida galstuk ko‘k va olov rang tusda bo‘ladi.
Keyin u do‘stlari Novoseltsev va Rijova bilan tanaffusga chiqadi, u yerda qahramonning galstugi olov rang va kumush rangga o‘zgaradi. Samoxvalov rahbarning kabinetiga qaytib kirganida, aksessuar avvalgi rangiga qaytadi.
Filmning final qismida Kalugina va Novoseltsev janjallashib qoladi. Novoseltsev rahbarni haqoratlagani uchun g‘azablangan Kalugina uning yuziga bir stakan suv sepib yuboradi. Xona devorlariga ham suv sachraydi.
Bir necha soniyadan so‘ng qahramonlar ofis atrofida bir-birini quvganda, devorda kichik tomchilar ko‘rinadi. Yana bir daqiqadan keyin devorda avvalgidan katta dog‘lar “paydo bo‘lib qoladi”.
Novoseltsev Samoxvalov oldidagi qarzini to‘laganidan keyin ko‘zoynagini yechadi.
Biroq bir zum o‘tgach, xuddi shu ko‘zoynaklar yana taqilgan holatdagi kadr paydo bo‘ladi. Keyingi kadrda esa Novoseltsev ko‘zoynagi yana uning qo‘lida paydo bo‘ladi.
“Yana o‘sha Myunxauzen”
Pastor bir oynadan ikkinchisiga o‘tganda, ekranda elektr rozetkasi ko‘rinib qolgan. Filmdagi voqealar esa XVIII asrda sodir bo‘ladi.
Myunxauzen oyga uchib ketmoqchi bo‘lgan so‘nggi sahnalardan birida baron bir soniya o‘z hakamlariga qarab, ularga yaqinlashadi. Ammo bir sekunddan so‘ng ekran rakursi o‘zgarganda stol ustidagi taomlar ham o‘zgarib qoladi.
Ko‘rib turganingizdek, archa ostida turgan xizmatkor ham g‘oyib bo‘ladi.
Baron qasr ichiga yugurib kirayotgan paytda esa fonda boshdan oyoq zamonaviy kiyimdagi sahna ishchilarini ko‘rishingiz mumkin.
“Karnaval”
Avvaliga so‘lib qolgan lolalar bir lahzadan so‘ng Ninaning qo‘llarida sehrli tarzda “tiriladi”.
“Brilliant qo‘l”
Gesha Kozodoyev omadsizlik oroli haqida qo‘shiq kuylayotgan vaqtda, uning sochi jingalak bo‘ladi. Kadr o‘zgarganda esa sochlari tekis va taralgan holatda qo‘shiq aytayotgani tasvirlanadi.
Semyon Gorbunkovni jinoyatchilar ta’qib qilganda uning kiyimlari dastlab tizzalarigacha dog‘ bo‘ladi lekin u xonaga yugurib kirganida, katta dog‘lar faqat ko‘ylagida borligini ko‘rish mumkin.
Ushbu kadrda Lyolikning mo‘ylovi bir tomondan deyarli ko‘chib ketgan bo‘ladi, biroq oradan biroz o‘tib, panjara ortiga tushib qolganida, aktyor mo‘ylovining o‘ng tomoni yana o‘rniga yopishtirilgan holatda namoyon bo‘ladi.
“Moskva ko‘z yoshlarga ishonmaydi”
Katerina bilan uchrashuvining boshida Volodyaning barmog‘idagi nikoh uzugi uning o‘ng qo‘lining nomsiz barmog‘ida bo‘ladi, bu uning uylangan ekanini anglatadi. Ammo kvartirada uzuk to‘satdan o‘rta barmoqqa taqiladi. Qizig‘i, Vera uning oilasi borligini biladi, shu sabab uzuk o‘rnini almashtirishga hojat yo‘q edi.
Oziq-ovqat do‘konida Katerina aravasini konserva bankalari bilan to‘ldiradi. U yerdan chiqishda esa Vera Alentovaning qahramoni piyoz va mevalar solingan ipli xalta, qo‘lida kichik paket va ko‘pi bilan ichiga uchta banka sig‘adigan sumkani ushlab turadi.
Aslida, do‘kondan xarid qilgan bankalar juda og‘ir bo‘lishi kerak, ammo aktrisa xuddi yengil narsalarni ko‘tarib yurgandek baland poshnada yengil harakatlar bilan qadam tashlaydi.
“I operatsiyasi va Shurikning boshqa sarguzashtlari”
Shurik va Lida imtihondan keyin uning uyiga qaytib kelishganda, Lida ventilyatorni yoqish uchun devordagi ipga qo‘lini uzatadi.
Biroq bir soniyadan so‘ng yaqindan olingan kadrda qizning bilaguzugi yaqqol ko‘rinib turgan qo‘li ko‘rsatiladi. Avvalgi kadrga ko‘ra, bilaguzuk chap qo‘lda edi.
“Ayoz bobo”
Bu kinodagi xatolik esa suratga olish guruhining aybi bilan sodir bo‘lgan. Marfusha Ayoz boboni kutayotgan sahnada olma yeyishi kerak edi. Ammo ular olmalarni mehmonxonada unutib qoldiradi va bir dona meva uchun ortga qaytmaslikka qaror qilinadi.
Natijada bechora Inna Churikova olma o‘rniga piyozni ishtaha bilan yeydi va ketidan sut ichadi.
Izoh (0)