AQSHda respublikachi Donald Trampning saylovoldi kampaniyasiga rahbarlik qilgan Syuzi Uayls inauguratsiyadan keyin Oq uy apparati rahbari bo‘ladi. U bu lavozimga egallagan birinchi ayolga aylanadi. Bu haqda CNN xabar berdi.
Syuzi Uayls Amerika tarixidagi eng yirik siyosiy g‘alabalardan biriga erishishimga ko‘maklashdi va 2016 hamda 2020-yillardagi muvaffaqiyatli saylov kampaniyalarimning ajralmas qismi bo‘ldi. U kuchli, aqlli, innovatsion shaxs bo‘lib, u hammaning hurmat va e’tiboriga sazovordir. Syuzi Amerikani yana buyuk qilish uchun tinmay mehnat qilishni davom ettiradi. Uning Qo‘shma Shtatlar tarixidagi birinchi ayol apparat rahbari bo‘lishi Syuzi uchun munosib sharafdir. U mamlakatimizni o‘zi bilan faxrlanishga undashiga shubha yo‘q, degan Tramp.
Uayls — floridalik tajribali siyosatchi. U Tramp kampaniyasiga de-fakto rahbarlik qilardi. CNN bu kampaniyani “eng murakkab va intizomli” deb baholagan.
Ta’kidlanishicha, Uayls Trampga apparat rahbari lavozimini egallashdan oldin ma’lum shartlarni qo‘ygan — ularning eng muhimi prezident bilan Oval kabinetda kimlar aloqa qila olishi ustidan kuchliroq nazorat o‘rnatish edi.
Trampning birinchi muddatida uning apparat rahbarlari Oq uyga norasmiy maslahatchilar, oila a’zolari, do‘stlar va boshqa begona shaxslarning prezident bilan uchrashish uchun kirishiga to‘sqinlik qilishga uringan.
Axios nashri Tramp o‘zining milliy xavfsizlik bo‘yicha jamoasida sobiq generallarni ko‘rishni xohlamasligi, biznesmen hamda kompaniya rahbarlarini afzal bilishini yozmoqda. U, shuningdek, o‘ziga sodiq shaxslarni Vashingtondagi rahbarlik lavozimlariga jalb etish imkoniyatini ko‘rib chiqmoqda.
Izoh (0)