MDH davlatlari 2030-yilgacha harbiy hamkorlik konsepsiyasi loyihasini ishlab chiqadi. Bu haqda MDH bosh kotibi Sergey Lebedev Moskvada bo‘lib o‘tgan MDH davlatlari xavfsizlik kengashlari kotiblarining 12-yig‘ilishida ma’lum qildi.
Lebedevga ko‘ra, bu hozirgi geosiyosiy vaziyatda o‘ta muhim hisoblanadi.
Uning ta’kidlashicha, hozirda butun dunyoda keskinlashuv va yangi qurolli mojarolar, shuningdek, AQSH va NATOning boshqa davlatlar ustidan hukmronlik qilish istagi tufayli bloklar va davlatlararo qarama-qarshiliklarning avj olishi kuzatilmoqda.
“Dunyodagi geosiyosiy vaziyatning keskinlashuvi fonida Mustaqil Davlatlar Hamdo‘stligiga aʼzo davlatlar 2030-yilgacha harbiy sohadagi hamkorlik konsepsiyasini ishlab chiqishga kirishdi”, deydi tashkilot bosh kotibi.
Lebedev “hozirgi sharoitda bu turdagi hamkorlikni kuchaytirish muhim barqarorlashtiruvchi omil” ekanini qayd etgan.
“Mazkur konsepsiya loyihasi o‘rta muddatli istiqbolda o‘zaro hamkorlik uchun aniq ustuvorliklar va yangi yo‘nalishlarni belgilab beradi”, deya qo‘shimcha qilgan u.
MDH rahbari ishtirokchi davlatlar qurolli kuchlarining jangovar va taktik-texnik tayyorgarligi mavjud amaliy tajriba hamda ilm-fan yutuqlari bilan o‘zaro boyitish asosida amalga oshirilishi kerakligini aytgan.
Izoh (0)