Kelgusi hafta Avstraliya parlamentiga 16 yoshgacha bo‘lgan bolalarning ijtimoiy tarmoqlardan foydalanishini cheklash to‘g‘risidagi qonun loyihasi kiritiladi.
Avstraliya bosh vaziri Entoni Albaneze bunday qonun zarurligini tushuntirar ekan, u ijtimoiy tarmoqlar avstraliyalik bolalarga yetkazadigan “zarar”ni minimallashtirishi kerakligini aytgan.
“Bu qonun ota-onalar uchun. Ular ham men kabi internetda farzandlarining xavfsizligi haqida qayg‘uradilar. Men avstraliyalik oilalar hukumat ularga yordam berishini bilishlarini istayman”, deb va’da berdi Entoni Albaniz.
Bosh vazirning taʼkidlashicha, qonun loyihasini muhokama qilish chog‘ida hukumat nafaqat ota-onalar, o‘qituvchilar, bolalar tarbiyasi bo‘yicha mutaxassislar, balki platformalar bilan ham maslahatlashgan.
Albanizga ko‘ra, ushbu qonunni buzganlik uchun javobgarlik bolalar va ularning ota-onalariga emas, balki ijtimoiy tarmoqlarning o‘ziga yuklanadi. Platformalar “bolalarni o‘zlaridan uzoqlashtirish uchun oqilona choralar ko‘rishlarini” isbotlashlari kerak. Qonun matni istisnolarni nazarda tutib, ta’lim maqsadlarida ijtimoiy tarmoqlardan foydalanishni cheklamaydi.
Hozirda Avstraliyada ko‘plab ijtimoiy platformalar 13 yoshdan oshgan bolalarga akkaunt yaratish imkonini beradi. Qonun loyihasi parlamentda qabul qilinganidan keyin 12 oy o‘tgach kuchga kiradi.
Avstraliyaning eng yirik bolalar huquqlari tashkilotlaridan biri mazkur taqiqni tanqid qilib, uni “juda qo‘pol vosita” deb atagan.
Izoh (0)