O‘zbekistonda valyuta kursi o‘zgarishining inflyatsiyaga taʼsiri o‘rganib boriladi. Bu haqda Markaziy bank raisi Mamarizo Nurmurodov 31-oktyabr kuni jurnalistlar bilan muloqotda maʼlum qildi, deya xabar berdi “Daryo” muxbiri.
Mamarizo Nurmurodovning aytishicha, Markaziy bank valyuta kursi bo‘yicha prognoz bermaydi.
“Lekin valyuta kursi o‘zgarishining inflyatsiyaga taʼsirini, albatta, o‘rganganmiz. Oxirgi hisob–kitoblarga ko‘ra, valyuta kursining 1 foizga qadrsizlanishi inflyatsiyaga 0,3–0,4 foiz taʼsir ko‘rsatishi mumkin”, dedi regulyator rahbari.
Mamarizo Nurmurodov 2023-yil iyulda jurnalistlar bilan muloqotda so‘m yiliga qay darajada qadrsizlanayotganini aytgandi.
“To‘rt yildan ortiq vaqt davomida milliy valyutamiz yiliga o‘rtacha 6–7 foizga qadrsizlanyapti. Bu bilan inflyatsiya 10 foizdan yuqori bo‘layotgan sharoitda valyuta qadrsizlanib ketyapti, deyishga hech qanday asos yo‘q”, degan” Markaziy bank rasmiysi.
Tahlillarga ko‘ra, 2023-yil boshidan 2024-yil iyunigacha bo‘lgan davrda ichki valyuta bozorida so‘m AQSH dollariga nisbatan taxminan 12 foizga qadrsizlangan.
Makroiqtisodiy va hududiy tadqiqotlar instituti ekspertlari tahliliga ko‘ra, mamlakatda uch asosiy omil valyuta almashuv kursi o‘zgarishiga taʼsir ko‘rsatmoqda. Ular — nominal kurs summasi o‘zgarishi, O‘zbekiston va savdo hamkorlarida narxlar darajasi turlicha shakllanishi hamda respublika tashqi savdo aylanmasida hamkor mamlakatlar ulushi ko‘p bo‘lishi bilan bog‘liq.
Izoh (0)