Rossiya Davlat dumasida tug‘ilish darajasini oshirish uchun kvartiralar va avtomobillar ishtirokida yutuqli o‘yin o‘ynash taklif etildi. Bu haqda “RIA Novosti” xabar berdi.
Taklif parlament quyi palatasi vitse-spikeri Boris Chernishov tomonidan ilgari surilgan. U lotereya mamlakatdagi demografik vaziyatni yaxshilashga qaratilishini aytgan.
“Gap tug‘ilishni rag‘batlantirish maqsadida yangi tug‘ilgan chaqaloqlar uchun butun Rossiya miqyosida lotereya o‘tkazish haqida ketmoqda. Masalan, har oy yangi tug‘ilgan Rossiya fuqarolari o‘rtasida 10 ta kvartira, 100 ta avtomobil va 1000 ta uy jihozlari to‘plamini o‘ynash taklif etilmoqda”, deydi deputat.
U bunday lotereyalarda ishtirok etishni FHDY ro‘yxatlaridan foydalangan holda avtomatik tarzda amalga oshirish mumkinligini aytdi. Tegishli tashabbus Leningrad viloyati va Xabarovskda allaqachon amalga oshirilgan.
“Har bir insonda azart bor. Axir har qanday lotereyada ozchilik yutadi, lekin minglab odamlar omadlarini sinab ko‘rish istagida muntazam chipta sotib oladi. Yangi tug‘ilgan chaqaloqlar uchun o‘tkaziladigan o‘yinda ham xuddi shunday tamoyil mavjud, faqat bu odamlar, jamiyat va mamlakat foydasiga xizmat qiladi”, dedi Chernishov.
Uning fikricha, bunday loyihaning amalga oshirilishi farzand ko‘rishni xohlovchi oilalarni qo‘llab-quvvatlashda rag‘batlantiruvchi omil bo‘ladi va dasturning o‘zi tug‘ilish masalalariga e’tiborni jalb qiladi.
“Yangi tug‘ilgan chaqaloqlar uchun lotereya bolali oilalarni qo‘llab-quvvatlash bo‘yicha keng ko‘lamli davlat dasturining bir qismi bo‘lishi mumkin, bu oxir-oqibat Rossiyadagi demografik vaziyatni yaxshilashga xizmat qiladi”, dedi u.
Rossiya prezidenti Vladimir Putinning sakkiztadan farzand ko‘rishni talab qilganiga qaramay, Rossiyada tug‘ilish pasayishda davom etmoqda. “Rosstat” ma’lumotlariga ko‘ra, 2024-yilning dastlabki olti oyida Rossiyada 599,6 ming chaqaloq tug‘ilgan. Bu 2023-yilning shu davriga nisbatan 16,6 mingga kam.
Shu bilan birga, o‘tgan 12 oy davomida umumiy tug‘ilish koeffitsiyenti 1,442 gacha pasaydi. Bu 2008-yildan buyon eng past ko‘rsatkichdir. Salbiy demografik tendensiyani to‘xtatish maqsadida Rossiya Fanlar akademiyasi “maxsus demografik operatsiya” o‘tkazishga chaqirdi. U ko‘p farzandli oila qurish uchun rossiyaliklarni qishloqlarga ommaviy ko‘chirishni nazarda tutadi.
Izoh (0)