Ijtimoiy tarmoqlarda O‘zbekistondagi maktab va bog‘chalarda trixofitiya kasalligi tarqalayotgani haqida turli xabarlar tarqaldi. Rasmiylar bu xabarni rad etdi.
Mazkur xabarlarga aniqlik kiritish maqsadida Sog‘liqni saqlash vazirligi matbuot xizmati Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazi professori Egamberdi Eshboyevga murojaat qildi. Mutaxassis tarqalgan xabarlar asossiz ekanini bildirdi.
Uning ta’kidlashicha, xalq tilida “temiratki” deb nomlangan ushbu kasallik O‘zbekistonda ko‘payib ketmagan.
“Bu kasallik kecha yoki bir kunda paydo bo‘lmagan, u azaldan bor. U o‘ta xavfli kasalliklar toifasiga kirmaydi”, deydi Egamberdi Eshboyev.
Shifokorning ma’lum qilishicha, hozirgi kunda bu kasallikni davolashga mo‘ljallangan yuzdan ortiq preparat bor va ularning hammasi yetarli darajada. Kasallikning diagnostikasi ham murakkab emas. Umumiy amaliyot shifokori ham bunga tashxis qo‘ya oladi.
Sanitariya-epidemiologiya qo‘mitasi e’lon qilgan ma’lumotga ko‘ra, ushbu kasallik bilan kasallanish holatlari doimiy ravishda Teri va tanosil kasalliklari shifoxonasi tomonidan ro‘yxatga olinib boriladi. Kasallangan bemorlar holatiga qarab statsionar va uy sharoitida davolanadi. 2024-yilda O‘zbekistonda trixofitiya bilan kasallanish kamaygani kuzatilmoqda.
Trixofitiya — kasal hayvonlar bilan aloqa qilganda tez yuqadigan va tarqaladigan teri zamburug‘li yuqumli kasallik. Uning surunkali sust shakllari, ayniqsa keng tarqalgan bo‘lib, infeksiya umumiy taroq, yostiq va uy-ro‘zg‘or buyumlaridan foydalanish orqali barcha oila a’zolariga ta’sir qiladi. Haddan tashqari zichlik, shaxsiy gigiyenaning yetishmasligi va himoyalanmagan teri bilan tez-tez aloqa qilish kabi omillar oilaviy infeksiya ehtimolini oshiradi.
Barcha yosh guruhlarida kasallanish taxminan bir xil, ammo trixofitiya ko‘proq yosh va maktab yoshidagi bolalarda tashxis qilinadi.Kasallikka chalinmaslik uchun qarovsiz hayvonlarni uyga olib kirib, parvarishlashdan saqlash, shaxsiy gigiyena qoidalariga qat’iy amal qilish lozim.
Izoh (0)