Futbol bo‘yicha Tojikiston terma jamoasi Rossiyaga qarshi o‘rtoqlik o‘yini o‘tkazishga tayyor.
“Keyingi yilda bir nechta o‘rtoqlik o‘yinlari o‘tkazish bo‘yicha rasmiy kelishuv bo‘lgani yo‘q, ammo RFI bilan doimo bu mavzuda aloqada bo‘lib turibmiz.
Bizda yaqin kelajakda uy va mehmonda Rossiyaga qarshi o‘yin o‘tkazish g‘oyasi bor. Jamoamiz istalgan paytda Rossiya bilan o‘ynashga tayyor.
Biroq hamon o‘yinlar sanasi bo‘yicha gaplashganimiz yo‘q. Keyingi yilda ham “FIFA kunlari” ko‘p bo‘ladi, balki o‘sha kunlarning birida biz o‘rtoqlik o‘yini o‘tkazarmiz. Ha, bu o‘yinni tashkil etilish ehtimoli bor”, — deydi Tojikiston futbol federatsiyasi bosh kotibi Furxat Ahmedjanov.
Oktyabr oyidagi FIFA tanaffusida Rossiya terma jamoasi Pokiston termasi bilan o‘ynashi kerak edi, biroq raqib o‘rtoqlik uchrashuvidan bosh tortdi. Natijada Valeriy Karpin shogirdlari yig‘inni o‘yinsiz o‘tkazdi.
Ma’lumot uchun, 2022-yilning fevral oyidan boshlab FIFA va UEFA qarori bilan Ukrainadagi vaziyat tufayli Rossiyaning barcha terma jamoalari va klublari xalqaro turnirlardan chetlashtirildi. Shu tariqa Rossiya erkaklar terma jamoasi Qatardagi jahon chempionati va Germaniyada bo‘lib o‘tgan Yevropa chempionatini o‘tkazib yubordi.
Izoh (0)