Toshkentdagi xususiylashtirilgan International mehmonxonasi Rossiyaning Azimut Hotels mehmonxonalar tarmog‘i boshqaruviga beriladi. Bu haqda kompaniya vakiliga tayanib “Vedomosti” nashri xabar berdi.
Xabarda aytilishicha, ushbu mehmonxona nomi Azimut Grand Hotel Tashkent deb o‘zgartiriladi. Bu Azimut’ning Markaziy Osiyodagi birinchi besh yulduzli mehmonxonasi va O‘zbekistondagi ikkinchi loyihasi bo‘ladi.
2024-yil iyul oyida Azimut Hotels Toshkentning Shota Rustaveli ko‘chasida to‘rt yulduzli mehmonxona ochgandi. Spot’ning yozishicha, u Azimut Hotels tomonidan boshqarilsada, mehmonxona kompaniya mulki ekanligini anglatmaydi.
International mehmonxonasi haqida
Ushbu mehmonxona 2024-yilning may oyida sotuvga qo‘yilgandi. Mehmonxona 232 ta xona, 7 ta konferens zal, 2 ta restoran, barlar, yozgi terrasa, fitnes-klub va basseynni o‘z ichiga oladi. Umumiy 3 gektar yer maydonida 44,903 kvadrat metr bino va inshootlar joylashgan.
2024-yil 19-aprelda qabul qilingan prezident qaroriga ko‘ra, 7 ta yirik kompaniyadagi, shu jumladan, InterHotel MCHJdagi davlat ulushlari professional konsultantlarni jalb qilgan holda, 2025-yilning oxirigacha xalqaro bozorda ommaviy savdolarga chiqarilishi belgilangandi.
2024-yilning noyabrida ushbu mehmonxonani sotib olish uchun eng yuqori narx taklifini bildirgan Smart Fast Stroy MCHJ 26 mln AQSH dollari miqdorida sotib olish to‘lovini to‘lash sharti bilan savdo g‘olibi deb topilgandi.
Izoh (0)