Butunjahon boks assosiasiyasi (WBA) o‘zbekistonlik bokschi Shahram G‘iyosov ishtirokidagi chempionlik jangiga promouterlik savdosini e’lon qildi.
Sentyabr oyida WBA yarim o‘rta vazn toifasidagi chempion, litvalik Eymantas Stanionis hamda majburiy da’vogar Shahram G‘iyosov jangiga buyruq bergan edi.
Lekin bokschilarning jamoalari bir oy ichida jang sanasi, manzili va shartlari bo‘yicha kelisha olishmadi. Endilikda promouterlar o‘rtasida kimoshdi savdosi tashkil etiladi. Ochiq savdo 8-noyabr kuniga belgilandi.
Ma’lumot uchun, G‘iyosov so‘nggi jangida meksikalik Migel Parra (22-4-1)ni mag‘lubiyatga uchratgan edi. To‘liq 10 raund davom etgan jangda hakamlarning ikki nafari o‘zbekistonlik bokschi g‘alabasini, bir nafari Parraning g‘alaba qozonganini qayd etgandi.
G‘iyosov bugungacha 16 ta jang o‘tkazgan va barchasida g‘alaba qozongan.
Litvalik 30 yoshli bokschi professional boksda 15 ta jang o‘tkazib, barchasida g‘alaba qozongan. Janglarining 9 tasini muddatidan avval yakunlagan.
Izoh (0)