Rossiya prezidenti ma’muriyati maslahatchisi Sergey Karaganov yadroviy qurolni “Yaratganning sovg‘asi” deb atadi va undan foydalanish joiz ekanini aytdi.
U bu fikrini “Ushlab turishdan qo‘rqitishgacha: yadroviy qurollar, geosiyosat, koalitsiya strategiyasi” nomli kitob taqdimotida bayon etgan.
“Bizda yadro quroli borligi Yaratganning sovg‘asidir. U barchadan oldin yadro quroliga ega bo‘lishga intilgan nemislarni qandaydir tarzda to‘xtatdi. Keyin esa Oppengeymerlar va Fukslarning qo‘llari bilan uni bizga berdi. Shunday qilib, U insoniyatni qutqardi. Biz Xudoni g‘azablantirmasligimiz kerak. O‘zimizni qutqarish uchun bizga berilgan qurollardan faol foydalanishimiz kerak”, deydi siyosatchi.
Uning so‘zlariga ko‘ra, bunday qurollarni ishlatishdan bosh tortish Sovet va Rossiya xalqi oldida gunohdir, chunki ularni yaratish uchun millionlab odamlar o‘z jonini qurbon qilgan.
Karaganovning so‘zlariga ko‘ra, yadro qurolidan foydalanish sohasida amaldagi doktrina va siyosat eskirgan hamda o‘z vazifalarini bajarmaydi, shuningdek, u bunday qurollardan foydalanishni deyarli butunlay istisno qiladi. Karaganov bunday siyosatni “axloqsiz” deb atadi va doktrinani qayta ko‘rib chiqishga chaqirdi.
Shuningdek, u Berlinga odatiy raketa hujumini uyushtirishga chaqirdi:
“Agar dron yana Kremlga uchsa, nega birinchi navbatda Reyxstagga muntazam raketa hujumini uyushtirmaslik kerak?”
Izoh (0)