Angliya terma jamoasining yangi bosh murabbiyi Tomas Tuxel hujumchi Harri Keyn terma jamoa sardori bo‘lib qoladimi, degan savolga javob berdi.
“Hamma Harriga qanday munosabatda ekanimni biladi. Uni “Bavariya”ga olib kelish uchun ko‘p mehnat qilishim kerak bo‘ldi. U allaqachon afsonaga aylanish yo‘lida. Bunday qarorlarni qabul qilishga hali erta. Men Li Karsliga hurmat ko‘rsatgan holda uning ishiga halaqit bermayman”, deya Tuxel so‘zlarini keltirmoqda Goal nashri.
Bundan tashqari, murabbiy nima sababdan “Manchester Yunayted”ni tanlamaganini ma’lum qildi.
“Angliya futbol assotsiatsiyasining g‘oyalari menga yoqdi. Buni bosh direktor Mark chiroyli tarzda tushuntirib berdi. Men uni ishga tushirish uchun qaror chiqarishim kerak edi. Bu nafaqat terma jamoa, balki klub ham bo‘lishi mumkin edi”, dedi Tuxel.
Ma’lumot uchun, Angliya termasi boshqaruviga kelguniga qadar Tuxel uzoq vaqt davomida “Manchester Yunayted” bilan muzokaralar olib borgandi.
Mutaxassis 2025-yildan boshlab Angliya terma jamoasida ishlaydi. Shartnoma 2026-yilning iyuliga qadar amal qiladi. Bungacha Tomas Tuxel “Maynts”, “Borussiya Dortmund”, “PSJ”, Londonning “Chelsi” va Germaniyaning “Bavariya” klublarida ishlagan.
Izoh (0)