Shvetsiya politsiyasi Stokgolm markazidagi mehmonxonada jinsiy zo‘ravonlik bo‘yicha shikoyat kelib tushgach, tergov boshladi. Shvetsiya OAVining xabariga ko‘ra, gumonlanuvchi — “Real” futbolchisi Kilian Mbappe.
Kilian Mbappening hozirgi maqomi — “asosli gumonlanuvchi”
Kilianning Fransiya terma jamoasi o‘yinlari vaqtida Shvetsiyaga yo‘l olishi darhol mashmashalarni keltirib chiqargan edi. Terma jamoa sardori o‘yinni ko‘rish o‘rniga, tungi klubga borishni tanlagan. Bu esa turli tanqidlarga sabab bo‘lgandi.
Shvetsiyadan keyin Mbappe Korsikada ham ko‘zga tashlangan. Ushbu ta’til Kilian uchun ancha muammolarni keltirib chiqardi. So‘nggi 24 soat ichida “Real” yuzduzi atrofida jinsiy zo‘ravonlik va ta’qiblar haqida shov-shuvlar paydo bo‘la boshladi.
12-oktyabr kuni Shvetsiya mahalliy politsiyasiga jinsiy zo‘ravonlik bo‘yicha shikoyat kelib tushgan.
Qayd etilishicha, hodisa 10-oktyabr kuni Stokgolm markazida sodir bo‘lgan. Huquq-tartibot idoralari xodimlari Mbappe va uning hamrohlari joylashgan mehmonxonaga yetib borgan.
Gumonlanuvchilar haqida hech narsa ma’lum emas, prokuratura izoh berishdan bosh tortgan. Mish-mishlarga qaraganda, Mbappe asosiy gumonlanuvchi.
Kilianning o‘zi esa Twitter sahifasida ushbu xabarni soxta deya atadi: “Yolg‘on xabar. Tinglovdan bir kun oldin bo‘lishi tasodifdek”.
Futbolchi “PSJ” bilan bog‘liq muammoni nazarda tutgan. “PSJ”ning Mbappe oldidagi 55 million yevrolik qarzi bo‘yicha apellyatsiya shikoyati tinglanadi. Parijliklarning futbolchi oldida maosh va bonuslar borasida qarzdorligi mavjud edi.
Shvetsiya prokuraturasi Mbappening ismini tilga olmagan holda, jinsiy zo‘ravonlik bo‘yicha dastlabki tergov harakatlari boshlanganini e’lon qildi.
Shvetsiyaning TV4 telekanaliga ko‘ra, jabrlanuvchi politsiyaga Mbappe tomonidan jinsiy tajovuzga uchragani haqida xabar bergan. Ayni damda Mbappega Shvetsiya politsiyasi tomonidan “asosli ravishda gumonlanuvchi” maqomi berilgan. Bu Shvetsiyada shubhalanishning eng past darajasi hisoblanadi.
Izoh (0)