Mashhur aktyor yoki xonandalarning ijtimoiy tarmoqlariga nazar tashlasak, ular har kuni nimalar bilan band ekanidan darrov xabardor bo‘lamiz. Ular doimo o‘z maqsad va keyingi rejalarini muxlislari bilan ulashib boradi. Ammo har gastrol safari yoki syomka jarayonida yulduzlarni qo‘llab-quvvatlaydigan insonlar kim? Quyida taniqli san’atkorlarning turmush o‘rtoqlari bilan yaqindan tanishamiz.
Rich Pol — xonanda Adelning turmush o‘rtog‘i
Rich Pol bolaligidan sport sohasida ishlashni orzu qilgan. Hozirda u Klutch Sports Group agentligini boshqaradi va sportchilar manfaatlarini himoya qiladi. Uning birinchi mijozi mashhur basketbolchi Lebron Jeyms bo‘lgan.
Adel va Rich Pol uch yildan beri tanish bo‘lib, juftlik o‘tgan yili iyul oyida Londonda unashtirilganini e’lon qilgan. Ular ziyofatda tasodifan tanishib qolgan. 2023-yil oxirida ular turmush qurdi va hozirda baxtli hayot kechirmoqda.
Jeremi Dyufren — Lana Del Reyning turmush o‘rtog‘i
Xonanda Lana Del Reyning eri timsoh ovchisi bo‘lib ishlaydi. Ular munosabatlari haqida hech qachon OAV ga ma’lumot bermaydi va shaxsiy hayotini sir saqlaydi. Dyufren va Del Rey 2019-yilda Airboat Tours by Arthur kompaniyasi bilan ekskursiyada tanishishgan.
Avgust oyining oxirida ularni xonandaning konsertidan keyin paparatssi ko‘rib qolgan. Oradan bir necha oy o‘tgach, tarmoqlarda juftlikning yashirincha o‘tkazilgan to‘yi videosi tarqaldi. Lana videoga e’tiroz bildirgan bo‘lsa-da, ikkinchi yarmi haqida iliq fikrlar yozib qoldirdi:
“Kim nima desa ham, Jeremi ajoyib inson. Va biz juda baxtlimiz”, deb yozdi qo‘shiqchi paparatssi joylashtirgan video ostiga.
Maykl Polanski — Ledi Gaganing qallig‘i
Xonanda Ledi Gaganing nomsiz barmog‘idagi uzuk birinchi marta aprel oyida paparatssiga tushib qolgan edi. Ushbu suratlarga xonanda izoh berishdan bosh tortdi, biroq oradan olti oy o‘tgach, u o‘zining turmushga chiqayotgani haqidagi xabarlarni tasdiqladi: Ledi Gaga Fransiya bosh vaziri Maykl Polanski bilan unashtirilganini e’lon qildi.
Insayderlar fikriga ko‘ra, juftlik allaqachon to‘yga bog‘liq barcha rejalarni tuzib chiqqan va hozirda to‘y marosimini Yevropada o‘tkazish masalasini ko‘rib chiqmoqda.
“U menga tug‘ilgan kunimda turmush qurishni taklif qildi, o‘sha kun qattiq hayajonda edim”, deydi Ledi Gaga.
Maykl Polanski uzoq yillar davomida biznes va investitsiyalar bilan shug‘ullanib kelmoqda. Uning asosiy loyihasi Parker fondidir. Tadbirkorning ismi boshqa yirik tashkilotlar rahbariyati ro‘yxatida ham qayd etilgan.
Karter Rum — Peris Hiltonning turmush o‘rtog‘i
2019-yildan Peris Hiltonning shaxsiy hayotida ko‘plab burilishlar bo‘ldi. U biznesmen Karter Rum bilan uchrashishni boshladi, oradan bir yil o‘tgach, turmush qurish taklifini oldi. Hozirda ularning Feniks ismli o‘g‘li va London ismli qizi bor. Bolalar surrogatlik orqali dunyoga kelgan.
“O‘z juftingizni topganingizda, siz buni shunchaki bilmaysiz, balki qalbdan his qilasiz”, deydi Peris Karter haqida.
Ta’kidlash joizki, juftlik bir-birini bolalikdan tanigan, ularning oila a’zolari azaldan do‘st bo‘lib kelgan. Karterning ota-onasi ham badavlat oiladan bo‘lgan. Rumning boyligi 20 million dollar, Hiltonniki esa 300 million dollarga teng bo‘lishiga qaramay, oila baxtli yashaydi.
Tom Evans — Nikol Sherzingerning turmush o‘rtog‘i
Sherzinger sobiq regbichi Skot Evans bilan The X Factor: Celebrity teleko‘rsatuvini suratga olish vaqtida tanishgan. Er-xotin 2020-yildan uchrasha boshlagan.
Tom Evans 24 yoshigacha Shotlandiya terma jamoasida regbi bilan shug‘ullangan, biroq jarohat tufayli jamoani tark etgan. Hozirda u turli teledasturlarda chiqadi va model sifatida ishlaydi.
Syuzan Dauni — kichik Robert Daunining rafiqasi
Robert Dauni rafiqasi Syuzan bilan “Temir odam” filmidan avval, “Gotika” filmining suratga olish maydonchasida tanishgan. Syuzan film prodyuserlaridan biri bo‘lgan. Ikki yillik munosabatlardan keyin turmush qurishga qaror qilgan juftlikning hozirda ikki nafar farzandi bor. Syuzan ayni vaqtda ham prodyuserlik faoliyatini davom ettirib, turmush o‘rtog‘i bilan birgalikda yangi loyihalarni amalga oshirmoqda.
Kamila Alves — Metyu Makkonaxining rafiqasi
Kamila Alves People, Men’s Vogue va Bella kabi jurnallar uchun suratga tushgan taniqli modeldir. Bundan avval u ham farrosh, ham ofitsiant bo‘lib ishlagan. Bo‘lajak turmush o‘rtog‘i Metyu Makkonaxi bilan 2006-yilda tanishgan.
“Men Kamilani uchratgan kundan boshlab boshqa hech kim bilan vaqt o‘tkazmalikka qaror qildim. Biz bir-birimizni qattiq yaxshi ko‘ramiz va bunga hech qachon shubha qilmaymiz”, deydi aktyor rafiqasi haqida.
Juftlik 2012-yilda turmush qurgan, ularning uch nafar farzandi bor.
Izoh (0)