Sifatli ssenariy yozish oson ish emas, tajribali ijodkorlar ham ba’zida xato qiladi. Zukko tomoshabinlar esa eng puxta va yaxshi ishlangan film yoki seriallarda kamchiliklar topa oladi. Quyida mashhur filmlardagi ko‘pchilik sezmagan xatoliklar haqida ma’lumot beriladi.
“Oppengeymer” (2023)
1945-yillar tasvirlangan “Oppengeymer” filmidagi sahnalarning birida bosh qahramon Robert Oppengeymer Los Alamosdagi olomon oldida bo‘ladi, u yerda 50 ta yulduz rasmi tushirilgan Amerika bayrog‘i hilpirab turadi. Biroq yulduzli bayroq 1945-yilda mavjud bo‘lmagan. O‘sha davrdagi prezident Duayt Eyzenxauerning buyrug‘i bilan 1959-yilda ushbu bayroqning yangi ko‘rinishi rasman tasdiqlagan.
“Sheryurak” (1995)
“Sheryurak” filmining rejissyori, hammuallifi va bosh qahramoni Mel Gibson o‘z mehnat mahsulini munosib tarzda ko‘rsatish va tomoshabinlarni hayratda qoldirish uchun juda ko‘p harakat qildi, ammo loyiha tarixiy noaniqliklar va turli xil xatolardan xoli bo‘lmadi. Masalan, shotlandlar va inglizlar o‘rtasidagi jang paytida orqa tomonda Ford Mondeo rusumli mashinani ko‘rishingiz mumkin.
“Kelajakka qaytib” (1985)
Vaqt bo‘ylab sayohat haqidagi fantastikada ham bir qancha xatoliklar mavjud. Masalan, “Kelajakka qaytib” filmining birinchi qismidagi taniqli epizodda 1955-yildagi voqealar tasvirlanadi. Unda qahramon Marti Makflay sahnaga chiqib, “Jonni B Goode”ga tegishli, avval hech kim eshitmagan kompozitsiyani ijro etadi. Unda aktyor Gibson ES-345 rusumli gitara chaladi, ammo mazkur musiqiy asbob 1958-yildan keyin ishlab chiqarilgan.
“Kichik ayollar” (2019)
Luiza Mey Alkott qalamiga mansub “Kichik ayollar” kitobining ekranizatsiyasida 19-asrning o‘rtalariga oid davr namoyish etiladi. Ammo filmdagi interyerda Polshadan keltirilgan buloq suvi butilkasi va termos kadrga tasodifan tushib qolgan.
“Vikinglar” (2013–2020)
Tarixiy drama janridagi mazkur serialda bir nechta xatolarga yo‘l qo‘yilgan. Misol uchun, aktyorlar kiygan dubulg‘alar va ikkinchi darajali epizodik aktyorlar kiygan liboslar o‘sha davrdagi vikinglarga mos kelmaydi. Asosiysi, vikinglar bir-birlarini viking deb atamagan.
“Emili Parijda” (2020)
Film uchinchi mavsumining uchinchi epizodida muxlislar yana bir xatoni payqashdi. Bosh qahramon Emili Parijdagi mehmonxonalardan birida qoladi. Qiziqarlisi, derazalari turli tomonga qaragan har bir xonadan Parijdagi yagona bo‘lgan Eyfel minorasi ko‘rinib turadi.
Ijtimoiy tarmoqlarda bu haqida ko‘plab hazillar tarqaldi: “Qiziqarli fakt: Parijda yashovchi har bir odam kunning istagan vaqti va holatida, qayerga qaramasin, doim Eyfel minorasi unga ko‘rinib turadi, bino esa hech qanday vaqt va makon qoidalariga bo‘ysunmaydi”, deb hazillashdi foydalanuvchilaridan biri.
Izoh (0)