Fizika bo‘yicha 2024-yilgi Nobel mukofoti sovrindorlari e’lon qilindi

Stokgolmda Shvetsiya qirollik fanlar akademiyasining Nobel qo‘mitasi fizika bo‘yicha laureatlarni e’lon qildi.

2024-yilgi mukofot “sun’iy neyron tarmoqlari yordamida mashinaviy o‘rganishni ta’minlaydigan fundamental kashfiyotlar va ixtirolar uchun” Jon Hopfild va Jeffri Hintonga berilgan.

Laureatlar zamonaviy mashinali o‘qitishning asosi bo‘lgan usullarni ishlab chiqishda fizika vositalaridan foydalangan. Jon Hopfild (AQSHning Prinston universiteti) ma’lumotlardagi tasvirlar hamda boshqa turdagi shablonlarni saqlash va qayta tiklash imkonini beruvchi assotsiativ xotirani yaratgan.

Jeffri Hinton (Kanadaning Toronto universiteti) ma’lumotlardagi xususiyatlarni avtonom ravishda topa oladigan va shu tariqa tasvirlardagi ma’lum elementlarni identifikatsiya qilish kabi vazifalarni bajaradigan usulni ixtiro qilgan.

Laureatlarni taqdirlash marosimi Stokgolmda 10-dekabr kuni, Alfred Nobel vafot etgan kuni bo‘lib o‘tadi. 2024-yilda mukofot miqdori 11 million shved kronasi yoki taxminan 1,06 million dollarni tashkil etadi. Pul mukofotidan tashqari, Shvetsiya qiroli sovrindorlarga medal va diplomlarni topshiradi.

9-oktyabrda kimyo, 10-oktyabrda adabiyot, 11-oktyabr kuni Osloda tinchlik bo‘yicha Nobel mukofoti laureatlari nomi e’lon qilinadi. Shuningdek, 14-oktyabrda Shvetsiya banki tomonidan 1968-yilda ta’sis etilgan Alfred Nobel mukofotining iqtisod bo‘yicha sovrindori ma’lum bo‘ladi.