O‘zbekiston XDP Qoraqalpog‘iston Respublika Kengashi tomonidan Beruniy tumanida saylovoldi targ‘ibot uchrashuvi bo‘lib o‘tdi. Saylovchilar bilan bo‘lib o‘tgan muloqotda partiyaning yangi Saylovoldi dasturi hamda O‘zbekiston Respublikasi Oliy Majlisi Qonunchilik palatasi, Qoraqalpog‘iston Respublikasi Jo‘qorg‘i Kengesi, xalq deputatlari Nukus shahar Kengashi deputatligiga nomzodlar tanishtirildi.
Taʼkidlanganidek, mamlakatni har tomonlama taraqqiy ettirish, xalq farovonligiga erishish, davlat boshqaruvi samaradorligini oshirishda saylovlar fundamental ahamiyat kasb etadi. O‘zbekiston Xalq demokratik partiyasi uzoq yilliq tajribaga ega bo‘lib, yurtimizda o‘tkazilgan barcha saylovlarda muvaffaqiyatli ishtirok etib kelgan.
Kuchli jamiyatni rivojlantirish, huquqlar va imkoniyatlar tengligini taʼminlashdek umuminsoniy g‘oyalarga tayangani uchun partiyamiz g‘oyalari har doim dolzarb bo‘lib kelmoqda.
Samimiy muloqot tarzida o‘tgan uchrashuvda partiyaning Saylovoldi dasturidagi eng muhim yo‘nalish, xalq manfaatlari nuqtai-nazaridan ishlab chiqilgan g‘oya va takliflar yig‘ilganlarga tushuntirib berildi. Dasturda davlat va jamiyatni rivojlantirish, huquqlar va imkoniyatlar tengligini taʼminlash, kuchli ijtimoiy siyosat yuritishga qaratilgan 15 qadamni o‘zida mujassam etgan 100 ga yaqin taklif va tashabbuslar ilgari surilmoqda. Tabiiyki, partiya bosh maqsadidan kelib chiqqan holda doimgidek, ijtimoiy yo‘nalishga, ijtimoiy sohadagi muammolar yechimiga asosiy urg‘uni bergan.
Masalan, o‘zgalar parvarishiga muhtoj bo‘lgan 18 yoshgacha bolalarning kasalliklari ro‘yxatini kengaytirish, shu orqali doimiy parvarishga muhtoj bo‘lgan bolalarni parvarishlayotgan oilalarni davlat tomonidan ijtimoiy qo‘llab-quvvatlash tizimini yanada takomillashtirish choralari ko‘rish haqidagi tashabbuslar insoniylik tamoyillariga to‘la mos keladi.
Shuningdek, muloqotda partiya aholining qaysi hududda yashashidan qatʼi nazar davlat tomonidan kafolatlangan tibbiy xizmat olishi, sog‘liqni saqlash tizimini to‘liq raqamlashtirish orqali sohada shaffoflik taʼminlash tarafdori ekani taʼkidlandi.
Uchrashuvda saylovchilar ham faol ishtirok etib o‘zlarini qiziqtirgan savollar bilan murojaat qilishdi.
Har bir inson farovonligi uchun ovoz bering!
Izoh (0)