Ko‘plab go‘zallik tanlovlari g‘olibi Nigina Faxriddinova YouTube’dagi “Daryo” Lifestyle kanaliga bergan intervyusida uning muvaffaqiyatga erishishiga sababchi bo‘lgan og‘riqli bolalik xotiralari haqida gapirdi.
— Hamisha biror yutuqqa erishganimda bolaligim bilan bog‘liq og‘riqli hayotim ko‘z oldimdan o‘tadi. Hayotiy tajribam davomida bildimki, hayotda muvaffaqiyatga erishgan ko‘plab insonlar bolalagida ruhiy travmalar olgan ekan. Bunday insonlar shou-biznesda ham ko‘p. Chunki bolalik travmalari bor insonlarning aksariyati eʼtiborsiz muhitda, o‘zini keraksizdek his qilib yashagan bo‘lishadi.
Ammo bunday insonlar orasida qiyinchilikka osongina taslim bo‘ladiganlar, endi xohlaganimcha yashayman, deydiganlar ham yo‘q emas. Qaysi vaqtda o‘zimda kuch topib “Men to‘g‘ri yashashim va muvaffaqiyatga erishishim kerak”, degan maqsad qo‘yganimni bilmayman. Oson yo‘l bilan nimagadir erishishni xayolimga ham keltirmaganman. “Boy odamga turmushga chiqaman va u hamma narsamni qilib beradi”, degan fikr ham xayolimdan o‘tmagan. Uy-joysiz qolib ketganimizda onam hamisha bor umidi faqat men ekanligini aytardi.
Bolalik yillarimni sog‘inaman, ammo ko‘zim ham yoshlanadi. O‘gay otamning ruhiy bosimi, tanamga yetkazilgan zo‘ravonlik va atrofimdagi insonlarning ishonchsizligi meni qiynardi. Har narsaga qiziqardim va atrofimdagi insonlar menga ishonishlarini istardim. Ammo hamisha bunga o‘rgatgandan foyda yo‘q, kim ham bo‘lardi, degan kamsitishlarni eshitardim. Eng alam qilgani, o‘gay otamga qo‘shilib, onam ham menga ishonmasdi.
Hozir o‘ylab qo‘rqib ketaman, yosh bo‘la turib o‘zimni o‘ldirishga qanday kuch topgan ekanman, deyman. Bu xuddi stakanga suv to‘lishiga o‘xshaydi. Yillar davomidagi alam, kamsitilishlar sabr kosasini to‘ldiradi va bir kuni inson shardek portlaydi. Sababini bilmayman, ammo o‘gay otam meni hamisha kelajakda buzuq bo‘lib ketishim haqida taxmin qilardi.
Shunday vaziyatlarda o‘z otam qo‘ng‘iroq qilishini va meni qo‘llab-quvvatlashini kutardim. Ammo u Rossiyada bo‘lgani uchun onda-sonda telefon qilardi, xolos. Yosh bola bo‘lganim uchun o‘z otamning oldiga borishga imkonim yo‘q edi.
Ancha vaqtgacha o‘gay otamdan nafratlanib yurdim. Ammo hozir u kishidan minnatdorman. Qattiqqo‘llik qilgani uchun yaxshi tarbiya ko‘rgandirman, hayotda kurashib yashashga immunitetim hosil bo‘lgandir, deyman.
Boshimga santexnika uskunasi bilan urganidan keyin og‘ir operatsiyani boshdan kechirdim. Shundan keyin onam u inson bilan yashashni istamadi. Biz Toshkentga keldik, ammo keyin o‘gay otam bejiz bunday qahrli bo‘lmaganini angladim. Uning o‘zi ham qiyinchilikda ulg‘aygan va unda ham bolalik bilan bog‘liq travmalar bor ekan. Hozir o‘gay otam bilan iliq munosabatdamiz, uni allaqachon kechirib yuborganman. Dasturxonidan osh-tuz bergani va ulg‘aytirgani uchun faqat rahmat aytaman, deydi professional model Nigina Faxriddinova.
Izoh (0)