Din ishlari bo‘yicha qo‘mita umra tadbirlarini tashkil etayotgan turoperatorlarga ogohlantirish bilan chiqdi.
Ma’lum qilinishicha, o‘tkazilgan tahlillarga ko‘ra, internet va ijtimoiy tarmoqlarda umra tadbirlarini tashkil etish va o‘tkazishga oid xizmatlarni ko‘rsatish bilan bog‘liq reklama axborotlari faollashgani, tegishli litsenziya va ruxsatnomalar bo‘lmagan holatda ushbu xizmatlar reklama qilinayotgani kuzatilmoqda. Jumladan, turoperatorlar tomonidan oktyabr-dekabr oylarida umra ziyoratiga yuborish bo‘yicha xizmatlar keng reklama qilinayotgani qayd etilmoqda.
2024-yil 2-iyul kuni qabul qilingan qonunga ko‘ra, litsenziyaga ega bo‘lgan turoperatorlar tomonidan umra tadbirlarini tashkil etish va o‘tkazishga oid xizmatlarni ko‘rsatish 2024-yil 5-oktyabrga qadar amalga oshiriladi. Bunda, Din ishlari bo‘yicha qo‘mita mazkur sohadagi litsenziyalovchi vakolatli organ sifatida belgilandi.
2024-yil 5-oktyabrdan so‘ng umra xizmatini ko‘rsatish bo‘yicha barcha turdagi faoliyat noqonuniy hisoblanadi.
Ushbu qonunbuzarlik uchun litsenziya olish sohasidagi huquqbuzarliklar uchun yuridik shaxslarga solinadigan jarimalar miqdorlari BHMning 200 baravari (1-oktyabrdan 75 million so‘m) etib belgilangan. Umra tadbirlarini tashkil etish va o‘tkazishga oid xizmatlarini litsenziyaga ega bo‘lmagan subyektlar tomonidan ko‘rsatish taqiqlangan.
Din ishlari bo‘yicha qo‘mita ziyoratchilarni umra amallarini munosib va xavfsiz bajarishi uchun ogoh bo‘lishlari va keyinchalik turli ko‘ngilsiz holatlarga tushib qolmasliklari maqsadida ishonchli va kafolatlangan xizmatlardan foydalanishlarini tavsiya etdi.
Izoh (0)