Yevropa futbol assotsiatsiyalari ittifoqi (UEFA) Angliya terma jamoasini 2028-yilda o‘z uyida bo‘lib o‘tadigan Yevropa chempionatidan, shuningdek, ingliz klublarini Yevrokuboklardan chetlatishi mumkin. Bunga futbolni nazorat qiluvchi organ haqidagi qonun loyihasi sabab bo‘lmoqda.
Mart oyida Buyuk Britaniya hukumati yangi nazorat organi haqida qonun loyihasini taqdim etdi. Bu organ boy klublarning alohida ligalarga qo‘shilishini oldini olish va klublarni moliyaviy xatolardan himoya qilish uchun yaratiladi.
Manbaga ko‘ra, sentyabr oyida UEFA bosh kotibi Teodor Teodoridis Buyuk Britaniya madaniyat, OAV va sport vaziri Liza Nendiga maktub yozib, hukumatning futbol boshqaruviga aralashuvidan ogohlantirgan. Aks holda ingliz klublari va terma jamoalari UEFA musobaqalaridan, jumladan, Yevropa chempionati va Chempionlar Ligasidan chetlatilishi mumkin. Qolaversa, UEFA Yevropa saralash o‘yinlarini o‘tkazayotgani uchun Angliya Jahon chempionatiga chiqishda muammolarga duch keladi.
Ushbu maktub 2-sentyabr kuni yuborilgan, lekin hali Nendi tomonidan javob olinmagan. UEFA esa bu ma'lumotga izoh bermagan.
Izoh (0)