Toshkent shahrining Yakkasaroy tumanida zamonaviy suv tushar bog‘ barpo etiladi, deb xabar bermoqda tuman matbuot xizmati.
Bog‘ barpo etish bo‘yicha o‘tkazilgan taqdimotda tuman hokimi Nilufar Allabergenova “Pushkin” xiyobonida aholiga qulayliklar yaratish maqsadida bog‘ hududi zamonaviy dizayenda bo‘lishi haqida maʼlumot berdi.
Shuningdek, “Koç Construction” qurilish kompaniyasi masʼuli Bahri Saka uchrashuv ishtirokchilariga bog‘ hududida olib boriladigan ishlarning loyihasi bilan tanishtirib o‘tdi.
Qolaversa, Yakkasaroy tumanidagi Shota Rustaveli ko‘chasini 24/7 rejimida faoliyat yurituvchi, gastronomik turizm ko‘chasiga aylantirish loyihasi to‘g‘risida ham maʼlumotlar berib o‘tildi.
Xorijiy va mahalliy sayyohlar tashrif buyuradigan tunu-kun faoliyat ko‘rsatadigan savdo, ko‘ngilochar, gastronomik va turizm ko‘chasiga aylantirish, ushbu ko‘chadagi mavjud bino va inshootlarni zamonaviy qiyofaga keltirish, jumladan, qurilish-taʼmirlash, rekonstruksiya qilish va hududni obodonlashtirish haqida tanishtirildi.
Xabarga ko‘ra, gastronomik turizm ko‘chasida velosipedlar uchun uzunligi 1,6 km maxsus yo‘lak, 40 dona zamonaviy o‘rindiqlar tashkil etiladi. Shuningdek, imkoniyati cheklangan insonlar uchun 10 ta joyda maxsus panduslar o‘rnatiladi. Bundan tashqari, 1,5 km maydonda yashil hudud barpo etiladi.
Shu bilan birga, avtobuslar uchun mavjud 6 ta bekat to‘liq zamonaviy rekonstruksiya qilinadi. Hududda hojatxonalar tashkil etiladi.
Hududdagi kesib o‘tuvchi yer osti yo‘laklarga imkoniyati cheklangan fuqarolar uchun 4 dona pandus qoyiladi va 2 ta chorrahadagi yer osti yo‘laklari rekonstruksiya qilinadi.
Izoh (0)