Janubiy Koreyaning elektronika ishlab chiqaruvchisi Samsung Electronics kompaniyasi ba’zi bo‘linmalarida chet ellik xodimlarini 30 foizgacha qisqartirishni rejalashtirmoqda. Bu haqda manbalarga tayanib, Reuters xabar berdi.
Agentlik ma’lumotlariga ko‘ra, Samsung butun dunyo bo‘ylab o‘zining sho‘ba kompaniyalariga sotuv va marketing bo‘limi xodimlarini taxminan 15 foizga, administratsiya xodimlarni esa 30 foizgacha qisqartirish bo‘yicha ko‘rsatma bergan. Reja 2024-yil oxirigacha amalga oshiriladi va Amerika, Yevropa, Osiyo hamda Afrikadagi ish o‘rinlariga ta’sir qiladi.
“Qancha odam ishdan bo‘shatilishi va qaysi mamlakatlar hamda biznes bo‘linmalari ko‘proq zarar ko‘rishi hozircha noma’lum”, deyiladi xabarda.
Samsung kompaniyasi ba’zi chet el korxonalarida ishchi kuchini tartibga solish samaradorlikni oshirishga qaratilgan kundalik faoliyat ekanini bildirdi.
Reuters manbalaridan biri xodimlar sonining qisqartirilishi jahon iqtisodiyotining sekinlashishi sharoitida texnologik mahsulotlarga bo‘lgan global talabning pasayishiga tayyorgarlik ko‘rish doirasida amalga oshirilayotganini aytdi.
Ma’lumot o‘rnida, 2024-yilning birinchi choragida Janubiy Koreyaning Samsung giganti dunyodagi eng yirik smartfon yetkazib beruvchiga aylandi.
Izoh (0)