Isroil armiyasi Livandagi “Hizbulloh” harakati jangchilari va infratuzilmasiga qarshi profilaktik zarbalar berish bilan birga shimoliy jabhada hujum operatsiyalariga faol tayyorgarlik ko‘rmoqda. Bu haqda Isroil armiyasi shtab boshlig‘i Gerzi Halevi xabar berdi.
Golan tepaliklaridagi xavfsizlik holatini baholagan Halevi, Isroil kuchlari o‘tgan bir oy ichida ko‘plab “Hizbulloh” jangchilarini o‘ldirganini va harakatning Livandagi katta miqdordagi harbiy infratuzilmasini yo‘q qilganini qayd etgan.
“Shimoliy qo‘mondonlik Isroil armiyasining barcha imkoniyatlaridan foydalangan holda, ular bizga hujum qilishdan oldin Livandagi “Hizbulloh”ning nishonlariga zarba bermoqda va shu bilan birga biz bu maydonda hujumkor harakatlarga tayyorgarlik ko‘rmoqdamiz”, dedi isroillik harbiy qo‘mondon.
Uning qo‘shimcha qilishicha, shimoldagi aholiga, xususan, Golan tepaliklariga tahdidlarni kamaytirish uchun “Hizbulloh”ga qarshi zarbalar kombinatsiyasi juda muhimdir.
Isroil kuchlari mamlakat hududiga zarba berishga tayyorlanayotganini payqagach, 25-avgust kuni “Hizbulloh” nishonlariga oldindan zarba berib, minglab raketalarni yo‘q qilgan edi. Isroil harbiylarining ma’lum qilishicha, “Hizbulloh” obyektlari va qurollarini yo‘q qilish amaliyotida 100 ga yaqin samolyotlar qatnashgan.
“Hizbulloh” o‘sha kuni Isroilga 320 dan ortiq raketa va dronlar uchirganini ma’lum qilgan.
Isroil armiyasining “Galey SAXAL” radiostansiyasi xabar berishicha, yanvar oyidan buyon Livandan Isroilga qarata 6,6 mingdan ortiq raketalar, snaryadlar va dronlarning uchirilishi qayd etilgan.
Izoh (0)