Rossiya armiyasi 4-sentyabr kuni Ukrainaning Lvov shahriga raketalar bilan zarba berdi. Oqibatda kamida 17 kishi jarohatlandi.
Lvov meri Andrey Sadova hujum oqibatida bosh vokzal hududidagi turar-joy binolari yongani, ayrim uylarning derazalari singanini aytdi. Kamida 17 kishi, jumladan, 10 va 15 yoshli ikki bola jarohatlangan. Kasalxonaga 15 kishi yotqizilgan, ulardan besh nafarining ahvoli og‘ir.
Dastlabki ma’lumotlarga ko‘ra, Rossiya armiyasi Lvovga “Kinjal” gipertovushli raketalari bilan zarba bergan. Guvohlar mahalliy vaqt bilan soat 05:40 atrofida Lvov ustidan bir nechta raketa uchib o‘tganini aytgan. Shundan so‘ng, soat 05:46 da shaharda juda qattiq tovush eshitilgan, uylarning devorlari silkingan. Hujum tufayli Lvovdagi ikkita maktabda o‘qish boshlanmasligi ma’lum qilingan.
4-sentyabrga o‘tar kechasi Kiyev, Sumi, Lvov va Krivoy Rogda ham portlashlar kuzatilgan. Poytaxt chekkasida va Kiyev viloyatida havo hujumidan mudofaa tizimi ishlagan. Bundan tashqari, 4-sentyabr soat 05:00 atrofida Ukrainaning barcha viloyatlarida havo hujumidan trevoga e’lon qilingan. Ukrainadagi “taranglashgan tun” tufayli Polsha jangovar samolyotlarini havoga ko‘targan.
Polsha “o‘z havo hududini xavfsizligini ta’minlash uchun barcha zarur choralarni ko‘rayotgani” aytilgan. Reuters agentligiga ko‘ra, Polsha aviatsiyasi Rossiyaning Ukrainaga zarbalari tufayli sakkiz kun ichida uchinchi marta havoga ko‘tarilgan.
Izoh (0)