Mongoliya rasmiylari Rossiya prezidenti Vladimir Putinni Xalqaro jinoiy sud buyrug‘i bilan hibsga olishdan bosh tortishini mamlakatning energiyaga qaramligi va betarafligi bilan izohladi. Bu haqda Politico hukumatning Ulan-Batordagi vakiliga tayanib xabar berdi.
Xabarga ko‘ra, Mongoliya neft mahsulotlarining 95 foizini va elektr energiyasining 20 foizdan ortig‘ini qo‘shni davlatlardan import qiladi.
“Ushbu ta’minotlar bizning mavjudligimiz va xalqimizning mavjudligini ta’minlash uchun juda muhim. Mongoliya o‘zining barcha diplomatik munosabatlarida doimo betaraflik siyosatini saqlab kelgan”, deydi rasmiy Politico’ga.
Ismini oshkor etmagan huquqshunosning ta’kidlashicha, o‘zi a’zo bo‘lgan XJS buyrug‘iga rioya qilmagani sababli Mongoliya jinoiy javobgarlikka tortilishi mumkin.
Putinning Ulan-Batorga tashrifi oldidan Yevropa Ittifoqi, Ukraina hamda Xalqaro Amnistiya va Human Rights Watch kabi xalqaro inson huquqlari tashkilotlari Mongoliyani XJS bo‘yicha o‘z majburiyatlarini bajarishga chaqirgan edi.
Putin Mongoliyaga mamlakat prezidenti Uxnaagiin Xurelsuxning taklifiga binoan sovet va mo‘g‘ul qo‘shinlarining Yaponiya ustidan qo‘shma g‘alabasining 85 yilligiga bag‘ishlangan tadbirda ishtirok etish uchun tashrif buyurgan edi. Bu Rossiya prezidentining sud unga hibsga olish uchun order berganidan beri XJSning Rim statutini imzolagan mamlakatga birinchi tashrifidir. Mongoliya 2000-yilda Rim statutini imzolagan va 2002-yilda uni ratifikatsiya qilgan.
Izoh (0)