Italiya Vazirlar kengashi Yevropa tiklanish va taraqqiyot banki (YTTB) bilan Ukraina elektr tarmoqlarini qayta tiklash bo‘yicha qo‘shma moliyalashtirish to‘g‘risidagi kelishuvni tasdiqladi. Kiyevni qo‘llab-quvvatlash uchun 200 million yevro ajratiladi.
Bu haqdagi qaror Italiya Tashqi ishlar vazirligi bayonotida aytiladi. Kaxovka GES vayron bo‘lganidan keyin Ukrainaning “Ukrgidroenergo” GESning energiya quvvatini tiklash uchun 100 million yevro yo‘naltirilishi kutilmoqda. Bosh vazir o‘rinbosari va tashqi ishlar vaziri Antonio Tajani tegishli qonun loyihasining parlamentda tez qabul qilinishiga umid bildirdi.
Avgust oyi oxirida Rossiya harbiylari Ukrainadagi elektr podstansiyalariga hujum qildi. Kiyevda elektr va suv ta’minotida uzilishlar qayd etildi.
Ukraina prezidenti Vladimir Zelenskiy mamlakat energetika obyektlariga qilingan zarbani eng kuchlilaridan biri deb atadi. Ukraina Energetika vazirligi rahbari German Galushchenko avvalroq mamlakat “tarixdagi eng og‘ir qishni” kutayotganini aytgan edi.
Izoh (0)