O‘zbekistonda dori tarkibli ayrim mahsulotlar biologik faol qo‘shimcha sifatida ro‘yxatdan o‘tkazilgani aniqlandi. Bu haqda Raqobatni rivojlantirish va isteʼmolchilar huquqlarini himoya qilish qo‘mitasi xabar berdi.
Qayd etilishicha, hozirda dori vositasini ro‘yxatdan o‘tkazish talablari qiyinlashgani sababli, ayrim tadbirkorlar tomonidan ushbu tarkibli mahsulotlarni biologik faol qo‘shimcha (BFQ) hamda oziq-ovqat qo‘shimchalari sifatida ro‘yxatga o‘tkazish holatlari mavjud. Xususan, qo‘mitaga kelib tushgan murojaat yuzasidan o‘rganishlar o‘tkazilganda shunday holatlar aniqlangan.
Jumladan, Jo‘rabek Laboratories MCHJ QK tomonidan ishlab chiqarilgan “Orsa” dori vositasi boshqa ishlab chiqaruvchilar tomonidan BFQ sifatida ro‘yxatga olingani va murojaatdagi barcha mahsulotlarga Sog‘liqni saqlash vazirligining Ekspert komissiyasining tegishli qarorlariga muvofiq, biologik faol qo‘shimchasiga ruxsatnomalar berilgan.
Holat yuzasidan Farmatsevtika mahsulotlari xavfsizligi markazini jalb etgan holda o‘rganish o‘tkazilganda “Kifti-ob Dori Darmon”MCHJ tomonidan ishlab chiqarilgan “Kifti Orsa” nomli BFQ mahsuloti haqiqatan ham dori vositasi tarkibiga mos kelishi aniqlangan va mahsulotni o‘rnatilgan tartibda dori vositasi sifatida ro‘yxatdan o‘tkazish tavsiya etilgan.
Bundan tashqari:
- Malika Laboratories MCHJ tomonidan ishlab chiqarilgan “Ors”;
- Hvara MCHJ tomonidan ishlab chiqarilgan “Orsi Max”;
- Vitally XK tomonidan ishlab chiqarilgan “Orsasol” ;
- “Madina Farm Med” MCHJ tomonidan ishlab chiqarilgan “Fita Orsa” nomli BFQ mahsulotlari yo‘riqnomalarida dori vositasiga xos bo‘lgan xususiyatlar, ya’ni turli kasalliklarni davolash va oldini olish uchun qo‘llanishi xususida noto‘g‘ri ma’lumotlar keltirilgan.
Shundan so‘ng vakolatli organ tomonidan yuqoridagi ishlab chiqaruvchilarga aniqlangan barcha kamchiliklar bartaraf etilgunga qadar ishlab chiqarishni to‘xtatish. BFQ mahsulotini barcha savdo tarmoqlaridan qaytarib olish va bu haqda vakolatli organga axborot berish. korxonalar tomonidan olingan ruxsatnomalarni qonunda belgilangan tartibda Sanepidqo‘mitaga qaytarish choralari ko‘rilmoqda.
Yuqoridagilarga asosan qo‘mita tomonidan vakolatli organlarni jalb etgan holda ishlab chiqaruvchilarga javobgarlik masalasini ko‘rish hamda ushbu yo‘nalishdagi tizimli muammolarni bartaraf etish yuzasidan tegishli normativ-huquqiy hujjatlarga o‘zgartirish va qo‘shimchalar kiritish bo‘yicha takliflar ishlab chiqilmoqda.
Izoh (0)