“Chuqur” seriali Ay Yapım media shirkati tomonidan Kerem Chatay rejissyorligida suratga olingan. Mazkur loyiha drama va jangari yo‘nalishida bo‘lib, uning premyerasi 2017-yil oktyabrda bo‘lib o‘tgan. Suratga olish jarayoni Istanbulning Fotih tumanida amalga oshirilgan, shuningdek, baʼzi sahnalar Parij va Berlinda olingan.
Serial syujeti
Istanbul chekkasida Chuqur deb atalgan mahallada boshqaruvni qo‘lga olgan, o‘z hududini himoya qiladigan va mahalliy to‘dalar faoliyatini tartibga soladigan nufuzli Kochovali oilasi yashaydi. U yerning asosiy qoidasiga ko‘ra, giyohvand moddalarni mahalla ichida isteʼmol qilish yoki yetishtirish, olib chiqish va kiritish taqiqlangan. Ammo boshqa jinoiy guruhlar mahalla boshqaruvini o‘z qo‘liga olishga harakat qiladi va natijada turli ziddiyatlar yuzaga keladi.
“Chuqur” seriali nimasi bilan tomoshabinlarni jalb qilgan?
“Chuqur” seriali Turkiyaning Show TV telekanalida 2017-yilda namoyish etilgan va to‘rt yillik efir davomida televideniye reytinglarda yetakchilikni qo‘ldan boy bermagan. Serial birinchi navbatda puxta yozilgan va qiziqarli ssenariy sababli muvaffaqiyat qozongan.
Undagi xilma-xil voqealar tomoshabinlar keyingi voqealar rivoji qanday bo‘lishini taxmin qilishiga yo‘l qo‘ymaydi. Loyiha jamoasi serialning o‘ziga xos vizual tilini ishlab chiqdi: Chuqur mahallasidagi binolar va ulardagi graffiti chizmalari o‘ziga xos jangovor muhitni yaratgan edi.
Serial tarixda shunchaki barchaga tanish turk seriallaridan biri bo‘lib qolmadi. Loyiha ustida ishlash jarayonida ijodkorlar turli ijtimoiy tashkilotlar va fondlar bilan hamkorlik qilib, muntazam ravishda muhim mavzularni ko‘tarib chiqishgan. Ular orasida, ekologiya, autizm kasalligi kabi dolzarb mavzular ham mavjud.
“Chuqur” seriali aktyorlarining bugungi hayoti
-lQuZ9qr2.jpeg)
Loyihada bosh qahramonni gavdalantirgan Aras Bulut Iynemli bugungi kunda turli serial va filmlarda rol o‘ynashda davom etmoqda. U oxirgi marta “Otaturk 1881-1919” filmida ishladi va Turkiyaning birinchi prezidenti Mustafo Kamol Otaturk rolini ijro etdi.
Film 2023-yil kuzda, Turkiya Respublikasi tashkil topganining 100 yilligi munosabati bilan ishlab chiqildi. Asar SİYAD nomli Turkiya kino tanqidchilari uyushmasi tomonidan oltita mukofotga sazovor bo‘ldi, jumladan, Aras Bulut “Eng yaxshi erkak roli” nominatsiyasida g‘olib bo‘ldi. 2024-yil 5-yanvarda filmning ikkinchi qismi butun mamlakat kinoteatrlarida namoyish etildi.
“Chuqur” seriali tomoshabinlari Idris Kochovali uchun ma’lumotlar yig‘uvchi bo‘lib ishlagan Alicho obrazini alohida e’tirof etishgan. Boshpanasiz erkak rolini ijro etgan aktyor Riza Kochao‘g‘lu bugungi kunda ham kino sanoatida faol ishlab kelmoqda.
Uning ishtirokida “Yaxshi odamning 10 kuni” va “Yomon odamning 10 kuni” nomli filmlar Netflix’da namoyish etildi.
Modellik olamining eng yuqori pog‘onasiga ko‘tarilgan yana bir turk aktrisasi Dilan Chichek Deniz serialda Yamachning asosiy tayanchi va suyanchiga aylangan Sena obrazini gavdalantirgan. Aktrisa bugungi kunda ham modellik faoliyatini davom ettirmoqda.
U 2014-yilda “Koinot go‘zali” tanlovida Turkiya sharafini himoya qilgan. Chichek Deniz muntazam ravishda turli jurnallar muqovasi, Armani kosmetika va parfyumeriya reklamalari uchun suratga tushib kelmoqda.
Izoh (0)