“Serbiya mamlakatda davlat to‘ntarishiga tayyorgarlik haqida Rossiyadan maʼlumot oldi” — Aleksandr Vuchich

Serbiya prezident Aleksandr Vuchich Rossiyaning rasmiy kanallari orqali mamlakatda kutilayotgan ommaviy tartibsizliklar haqida xabardor qilinganini aytdi.

Uning so‘zlariga ko‘ra, provokatsiyadan maqsad Serbiyada davlat to‘ntarishini amalga oshirishdir.

“Bugun biz Rossiya Federatsiyasidan rasmiy maʼlumot oldik. Ma’lumotlar rasmiy kanallar orqali olingan, biz uni o‘rganyapmiz. Xavfsizlik va Axborot Agentligi bunga mas’uldir. Serbiya hukumatida va boshqa barcha joylarda bunga mas’ul odamlar o‘z vazifalarini bajarmoqda”, dedi Vuchich jurnalistlar bilan suhbatda.

8-avgust kuni Serbiyaning “Vecernje Novosti” gazetasi Serbiyadagi g‘arbparast muxolifat vakillari 10-avgust kuni Belgradda o‘tkazilishi rejalashtirilgan norozilik namoyishlaridan prezident saroyini egallab olish uchun foydalanmoqchiligi haqida xabar berdi. Shuningdek, ular Aleksandr Vuchichga suiqasd uyushtirishga tayyorgarlik ko‘rayotgani aytgan.