O‘zbekiston va Tojikiston Sarez ko‘lidan ichimlik suvi olish masalasini muhokama qildi.
3-avgust kuni Dushanbeda Tojikiston va O‘zbekiston o‘rtasida Markaziy Osiyo transchegaraviy daryolari suv resurslaridan kompleks foydalanish bo‘yicha qo‘shma ishchi guruhining 7-yig‘ilishi bo‘lib o‘tdi.
Tojikiston Energetika va suv resurslari vazirligi matbuot xizmatining xabar qilishicha, unda mintaqa mamlakatlarini toza ichimlik suvi bilan ta’minlash uchun Sarez ko‘li suv resurslaridan foydalanish masalalari, Tojikiston va O‘zbekiston o‘rtasida suv xo‘jaligi sohasida yangi qo‘shma transchegaraviy loyihalarni amalga oshirish imkoniyatlari muhokama qilindi.
Asia-Plus nashrining yozishicha, Sarez suvidan ikki davlatning ichimlik suvi ehtiyojlari uchun foydalanish masalasi 2018-yildayoq Emomali Rahmon va Shavkat Mirziyoyev tomonidan Tojikiston rahbarining O‘zbekistonga davlat tashrifi chog‘ida muhokama qilingandi. Prezidentlar savdo-iqtisodiy hamkorlik bo‘yicha hukumatlararo qo‘shma komissiyaga bu imkoniyatni o‘rganish bo‘yicha topshiriq bergandi.
Emomali Rahmon xalqaro forumlardagi nutqlarida Tojikiston chuchuk suv bo‘yicha katta resurslariga egaligini bir necha bor taʼkidlab, Markaziy Osiyo mamlakatlarini uzoq muddatli ichimlik suvi bilan taʼminlash uchun Sarez ko‘lidan foydalanishni taklif qilgan.
Respublika hukumati ham Sarezdan Osiyoning boshqa mamlakatlariga, xususan, Eron, Iordaniya va Birlashgan Arab Amirliklariga ichimlik suvi yetkazib berishni yo‘lga qo‘yishni taklif qilgan.
Izoh (0)