O‘FA majlislar zalida O‘zbekiston U-23 jamoasi bosh murabbiyi Temur Kapadze ishtirokida matbuot anjumani bo‘lib o‘tmoqda. Bosh murabbiy musobagacha bo‘lgan tayyorgarlik, Parijdagi sharoitlar hamda natijalar borasida fikr bildirmoqda.
Kapadze “Olimpik” loyihasi borasida to‘xtaldi.
“3,5 yil oldin rahbariyat oldimizga yuqori maqsadni qo‘ydi. Bu davr mobaydnida katta yo‘lni bosib o‘tdik. Ko‘plab yoshlarga futbolda o‘z o‘rnini topishiga xizmat qildik, “Olimpik”dan milliy jamoalarga chaqiruvlar olishdi.
Bu jamoa ilk mavsumdanoq nimalarga qodirligini ko‘rsata oldi. Pro Ligadan Superligaga yo‘l olishni uddalandi va jamoa shu davrga qadar stabil o‘yin ko‘rsatib kelmoqda. Umuman olganda, 4 ta yirik musobaqada ishtirok etdik. Muxlislarimiz ishonchini oqlashga harakat qildik. Xudoga shukur, yuzimiz yorug‘ bo‘ldi. Eng asosiy vazifa — Olimpiada yo‘llanmasini qo‘lga kiritdik. Qolgan turnirlarda ham munosib ishtirok eta oldik, deb o‘ylayman.
Bizni qo‘llab-quvvatlagan rahbariyatga, muxlislarimizga va barchangizga rahmat aytaman. Futbolimizni yangi bosqichga olib chiqish yo‘lida bor imkoniyatimizni ishga soldik. Endi bu tarix”.
Bosh murabbiyning fikricha, tayyorgarlikka vaqt yetarli bo‘lmadi. Ba’zi futbolchilarda charchoq sezildi.
“Olimpiadaga keladigan bo‘lsak, Osiyo kubogidan keyin oldimizda ko‘p vaqt qolmagandi. Avvalo Olimpiadaga yo‘l olishdagi yuk bilan biz 3,5 yil harakat qildik, buni quvonchi albatta bor edi.
Ko‘p legionerlarimizda chempionatlar tugagandi, kimdirlardadir charchoq sezildi, ba’zilar jamoa almashtirdi. Balki oldimizda ko‘proq vaqt bo‘lganda boshqacha bo‘larmidi. Tayyorgarlikka kelsak, aytganimdek, vaqtimiz ko‘p emasdi. Tarkib shakllantirishda o‘ziga yarasha qiyinchiliklar bo‘ldi. Dukentda ham legionerlarsiz tayyorgarlik ko‘rishga to‘g‘ri keldi.
Yoshi katta futbolchilarimizning iqtidori, kuchini hammamiz yaxshi bilamiz. Futbolchilar bundan ko‘prog‘iga qodir edilar. Ularga minnatdorchilik bildiraman. Ular uchun ham, biz uchun ham foydali bo‘ldi. Bu — jamoaviy o‘yin. Eng asosiysi — biz barcha uchrashuvda g‘alaba qozonsak bo‘lardi, qayerdadir omad yetishmadi”.
Kapadzening fikricha, Ispaniya bilan o‘yinga qo‘yilgan taktikalar ishlagan.
“Ispaniyaning oxirgi o‘yinlarini tahlil qildik. Albatta o‘ziga yarasha kamchiliklarimiz ham bo‘ldi. O‘yinga qo‘ygan strategiyamiz yaxshi ishladi, ayniqsa, birinchi bo‘limda. Lekin ikkinchi bo‘limda Ispaniyaga imkoniyat berdik.
Ularga qarshi to‘g‘ri pressing qilib, imkoniyatlarga ega bo‘ldik. Bu o‘yindan keyin jamoa bilan ularning va o‘zimizning o‘yinimizni tahlil qildik. Biz o‘sha kuni raqibdan kuchsiz emasdik, eng kamida durang qayd etishimiz mumkin edi.
Umuman olganda, bundan ko‘prog‘ini kutgandik, biroq bizga omad yetishmadi. Eng muhimi biz katta tajribaga ega bo‘ldik”.
Murabbiy Misr bilan o‘yinda Jasur nega almashtirilgani haqida to‘xtaldi.
“Jasur o‘sha o‘yinda charchadi. Shu sababli almashtirdik.
Birinchi o‘yinda ham ko‘p kuch yo‘qotdik. Raqib qarshi hujumlarda bizga muammo tug‘dirdi. Ular zich himoyalandi, lekin yetarlicha imkoniyatlarimiz bo‘ldi”.
Taqvim ham O‘zbekiston Olimpiyachilariga biroz noqulaylik tug‘dirgan.
“Ilk uchrashuv ko‘p narsaga oydinlik kiritadi. Birinchi o‘yinda yutsangiz, keyingi o‘yinlarda bosim bo‘lmaydi. Biroq taqvim bizga bog‘liq bo‘lmagan holat edi. Raqiblarimiz ham o‘ziga yarasha kuchli. Bu musobaqada kuchsiz jamoa yo‘q edi. O‘yinlarda yetarlicha vaziyat yaratdik. Qayerdadir bosim halaqit berdi”.
Kapadze hech qaysi futbolchiga e’tirozi yo‘qligini ta’kidladi.
“Avvalo Prezidentimizga, O‘FA rahbariyatiga, muxlislarga minnatdorchilik bildirib qolaman. Sizlar bilan barcha yutuqlarga erishdik, sizlar bizga motivatsiya berdingiz, qiyin paytlarda qo‘llab-quvvatladingiz.
Murabbiylar shtabiga, ishchilarga, barcha-barchaga rahmat aytaman, ularning ham natijalarda xissasi bor.
Hech bir futbolchiga e’tirozim yo‘q. Aytganimdek, biz bundan ko‘prog‘ida qodir edik.
Vatan jamoasini sevishda, qo‘llab-quvvatlashda charchamanglar. Futbolchilarimizni yaxshi kunida ham, qiyin kunida ham yonida bo‘laylik. Ular ham bu mas’uliyatni his qilib maydonda boshqacha harakat qilishadi.
Barchangizga rahmat, sog‘ bo‘linglar”, deya Kapadzening so‘zlarini keltiradi O‘FA matbuot xizmati.
Ma’lumot uchun, O‘zbekiston Olimpiya jamoasi Ispaniya (2:1) va Misr (1:0) terma jamoalariga mag‘lub bo‘ldi hamda Dominikan Respublikasi bilan (1:1) durang o‘ynadi. Jamoa C guruhida 4-o‘rinni egalladi.
Izoh (0)