O‘zbekistonda 2024/2025-o‘quv yilidan yuqori malakali ilmiy-amaliy kadrlar potensiali mavjud bo‘lgan, zamonaviy moddiy-texnik bazaga ega xususiy klinikalarda klinik ordinaturada mutaxassis tayyorlash yo‘lga qo‘yiladi. Bu haqda Sog‘liqni saqlash vazirligi matbuot xizmati xabar berdi.
Qayd etilishicha, klinik ordinaturada mutaxassis tayyorlash bo‘yicha daʼvogar bo‘lib, Sog‘liqni saqlash vazirligiga talabnoma taqdim etgan xususiy klinikalarni amaldagi qonunchilikka muvofiq talablarga mos ekanligini aniqlash va taʼlim jarayoni boshlanishini belgilash Sog‘liqni saqlash vazirligi huzuridagi komissiya tomonidan amalga oshiriladi.
Komissiya xulosasiga muvofiq, bunday xususiy klinikalarni amaldagi qonunchilikda belgilangan shart va talablarga mos bo‘lganlari tanlab olinadi. Har bir xususiy klinikaga sifatli taʼlim jarayon amalga oshirish imkoniyatidan kelib chiqib:
- o‘qitiladigan mutaxassisliklar ro‘yxati;
- qabul kvotalari ko‘rsatkichlari;
- qabul jarayoni uchun masʼul kotiblar nomzodlarini belgilanadi.
Klinik ordinatura mutaxassislarini tayyorlaydigan xususiy klinikalar davlat tibbiyot oliy taʼlim muassasalariga hududlar kesimida biriktiriladi. Biriktirilgan tibbiyot oliy taʼlim muassasalari xususiy klinikalarga qabul jarayoni, nazariy taʼlim jarayoni, sifatli uzluksiz taʼlim jarayoni, bilim va ko‘nikmalar nazoratida metodik yordam ko‘rsatib boradi.
Klinik ordinatorlarni o‘qitish vakolati berilgan xususiy klinikalar o‘rnatilgan muddatda akkreditatsiyadan o‘tishi taʼminlanib, belgilangan namunadagi guvohnoma beriladi.
Eslatib o‘tamiz, Shavkat Mirziyoyev 22-yanvar kuni sog‘liqni saqlash sohasidagi islohotlarni jadallashtirish bo‘yicha takliflar taqdimoti bilan tanishgandi. Shunda Toshkent tibbiyot akademiyasining ta’lim dasturlari xalqaro akkreditatsiyadan o‘tkazilishi, unda jamoat salomatligi, profilaktik tibbiyot, jismoniy faollik ixtisosliklari bo‘yicha magistrlik yo‘nalishlari ochilishi to‘g‘risida aytilgan edi.
Izoh (0)