AQSH Yaqin Sharqqa qo‘shimcha qiruvchi samolyotlar va harbiy-dengiz floti kemalarini joylashtiradi. Bu haqda Pentagon rahbariyati 2-avgust kuni bergan maʼlumotga asoslanib, Reuters nashri xabar berdi.
Manbada aytilishicha, AQSH Eron va uning ittifoqchilari mintaqada kuchayishi va AQSH manfaatlariga tahdid solishi ortidan yangi harbiy qismlar yuborishga qaror qilgan. Ushbu qaror raqib tomonning eskalatsiya boshlash xavfini kamaytirishi maʼlum qilingan.
Pentagonning bir qancha rasmiylari Eron Isroilga zarba berishga tayyorlanayotganini aytgan. Chunki 2 kun oldin Tehronda HAMAS yetakchisi Ismoil Haniya o‘ldirilishida Eron Isroilning “Mossad” ayg‘oqchilik xizmatini ayblagan hamda qasos olishga vaʼda bergan.
AQSH mudofaa vaziri Lloyd Ostin Yaqin Sharq va Yevropaga ballistik raketalarni urib tushira oladigan qo‘shimcha dengiz floti kreyserlari va esminetslar yuborilishini maʼqullagan. Shuningdek, Yaqin Sharqqa qo‘shimcha qiruvchi samolyotlar eskadroni ham jo‘natilishi tasdiqlangan.
“Ostin AQSH kuchlarining himoyasini yaxshilash, Isroil mudofaasiga ko‘makni kuchaytirish va Qo‘shma Shtatlar turli kutilmagan vaziyatlarga javob berishga tayyor bo‘lishini taʼminlash uchun AQSH harbiy shtabiga tuzatishlar kiritishni buyurdi”, deyiladi Pentagon bayonotida.
Izoh (0)