AQSH TikTok va uning yaratilishi uchun asos bo‘lgan ByteDance kompaniyalarini sudga bergan. Bu haqda G‘arb nashrlariga tayanib, Anadolu ma’lum qildi.
Manbada aytilishicha, AQSHda bahsli bo‘lgan ijtimoiy tarmoqni mamlakat Adliya vazirligi hamda Federal savdo komissarligi sudga bergan. Bu haqdagi xabar 2-avgust kuni ikki tashkilotning rasmiy sahifasida eʼlon qilingan.
AQSH muassasalari TikTok va ByteDance’ni bolalar shaxsiy daxlsizligi to‘g‘risidagi qonunlarni buzishda ayblagan. TikTok videohosting xizmati faoliyati qayta ko‘rib chiqilishi kerakligi, xalqaro hamjamiyat tartib-qoidalariga amal qilish zarurligi taʼkidlangan.
TikTok bilan bog‘liq ishni hozirda Kaliforniya markaziy okrugi sudi ko‘rib chiqayotgani aytilgan. Sud daʼvogarlar murojaatini to‘la o‘rganib chiqib, so‘ngra jarayonlarni boshlashi bildirilgan.
“Daʼvo arizasiga ko‘ra, 2019-yildan hozirgi kungacha TikTok bolalarga oddiy TikTok akkauntlarini yaratish hamda platformada kattalar va boshqalar ishtirokida qisqa formatdagi video va xabarlar joylash, ko‘rish va tarqatishga ataylab ruxsat bergan”, deyiladi Kaliforniya sudi xabarida.
AQSH Adliya vazirligi TikTok platformasining 13 yoshgacha bo‘lgan bolalar uchun mo‘ljallangan versiyasini keskin tanqid ostiga olgan. Ushbu tizimda bolalar ham ro‘yxatdan o‘tish uchun elektron pochta manzili va shaxsiy maʼlumotlarini kiritishlariga to‘g‘ri keladi.
Daʼvogarlar TikTok rahbariyatidan platformaga ota-ona nazorati tizimini qo‘shish hamda kattalar nazoratisiz ochilgan voyaga yetmaganlar akkauntlarini o‘chirishni talab qilgan. Shuningdek, shaxsiy maʼlumot yig‘ish tizimini soddalashtirish taklif qilingan.
Izoh (0)