Aktrisa Dodo Chogovadze sanoqli filmlarda rol o‘ynagan bo‘lsa-da, “Alovuddinning sehrli chirog‘i” filmidagi malika Budur roli tufayli kinoda yorqin iz qoldirdi. Ushbu film chiqqandan so‘ng, 15 yoshli aktrisa tezda mashhurlikka erishdi: muxlislar unga xat yozishni boshladi, yigitlar turmush qurishni taklif qilishdi. Biroq u keyinroq teatrdagi hamkasbiga turmushga chiqdi. Ajrashgandan so‘ng esa oilaviy hayotdan ko‘ra yolg‘izlikni afzal ko‘rdi.
Dodo Chogovadze Tbilisida agronom Aleksandr Chogovadze oilasida tug‘ilgan. Bolaligidan u raqsga qiziqadi, bu uni avval xoreografiya maktabiga, keyin esa filmga olib keladi. 5 yoshida u birinchi marta “Manana” filmida kichik rol — maktab spektaklidagi rassom rolini o‘ynagan.
Shundan so‘ng Dodo Chogovadze ko‘pincha kichik rollarga taklif qilinadi. Debyutidan 5 yil o‘tgach, u “Kichik ritsarlar” filmida bosh rolni ijro etadi. Stanislav Rostotskiy uning iste’dodini payqab, unga “Zamonamiz qahramoni” filmidagi Bela rolini taklif qiladi. Biroq Dodoning atigi 13 yoshda ekanligini bilgach, rejissyor fikridan voz kechadi.
Biroq kastinglaridan so‘ng fotosuratlar Gorkiy kinostudiyasi kabinetida qolib ketadi. Bir yil o‘tgach, Dodo yana kastingga chaqiriladi va u Boris Ritsaryevning “Oluddinning sehrli chirog‘i” filmidagi malika Budur roliga tasdiqlanadi.
Qizning suratga olish maydonchasida unga hamroh bo‘lgan onasi rejissyorga qizi 15 yosh bo‘lsa-da, tez orada 16 ga to‘lishini aytadi. Onasi ham suratga olish jarayonida ishtirok etgani uchun kinostudiyadan maosh olgan.
Film ustida ishlayotganda yosh Dodo Chogovadzega butun suratga olish guruhi faol yordam beradi. Dodo baland darvozadan yiqilib tushganida, suratga olish darhol to‘xtatiladi va shifokor aktrisani ko‘rikdan o‘tkazgandan keyingina, rejissyor unga dublyor kerak degan qarorga keladi.
Suratga olish jarayonini 3 oyda yakunlash rejalashtirilgan edi, biroq belgilangan muddat o‘tib ketadi. Sentyabr oyida o‘quv yili boshlanganda Dodo Yaltadagi kechki maktabga qatnay boshlaydi. Unga asosiy aktyor Boris Bistrov hamrohlik qiladi. U shuningdek, qizga g‘amxo‘rlik qilib, uni qo‘llab-quvvatlaydi va turli muammolardan himoya qiladi.
Biroq 15 yoshli Dodo Boris Bistrovni sevmasdi. Uning butun e’tibori kostyumlar dizayneri Konstantin Zagorskiyga qaratilgandi. Bu beg‘ubor tuyg‘u bo‘lganini aktrisa iliq xotiralar bilan eslaydi.
Suratga olish ishlari tugagandan so‘ng Dodo Chogovadze xoreografiya maktabiga qaytadi — uning mashhurligi sinfdoshlari bilan munosabatlariga ta‘sir qilmaydi. Biroq ba‘zi o‘qituvchilar uni kinoya bilan “Gollivud yulduzi” deb atashadi. Aktrisa yigitlardan sevgi izhor qilingan minglab maktublar olgan bo‘lsa-da, u Paliashvili opera va balet teatrida ishlay boshlaganidan keyingina haqiqiy sevgisini topadi.
Teatrda Dodo musiqachi va qo‘shiqchi Devid Shushanin bilan tanishadi. Ularning yaqin munosabatlari gastrol paytida boshlanadi. Qaytganlarida esa Devid Dodoga turmush qurishni taklif qiladi.
Biroq oilaviy hayot Dodo tasavvur qilgan idealdan uzoq bo‘lib chiqadi. Ko‘p o‘tmay Devid Dododan teatrni tashlab, o‘zini uyga va qizi Ninoni tarbiyalashga bag‘ishlashni talab qiladi. Er-xotin Devidning qarindoshlari bilan birga yashagan va Dodo, barcha urinishlariga qaramay, har doim aybdor bo‘lib qolgan. Qaynona o‘g‘lini har qanday sharoitda ham qo‘llab-quvvatlashini darhol ma’lum qiladi.
Dastlab Dodo oilasini saqlab qolishga urinadi, biroq uning barcha urinishlari besamar ketadi. Ammo aktrisa mojarolardan charchaydi va ajrashishga qaror qiladi. Ajralishga qaramay, ularning munosabatlari yana 10 yil davom etadi. Devid Shushanin Dodo yashagan ota-onasining uyiga doimiy borib turadi. Ikkinchi marta uylanganidan keyin ham u sobiq xotini bialm munosabatlarini uzmaydi. Oxir-oqibat Dodo barchasiga nuqta qo‘yganida hayratda qoladi.
Dodo ikkinchi marta turmushga chiqishi mumkin edi, lekin u hammani rad etadi. Dodo Chogovadze “Alovuddinning sehrli chirog‘i” filmidan so‘ng, faqatgina “Tungi jodugarlar” filmida rol o‘ynaydi.
Izoh (0)