Transport vazirligi xalqaro yuk tashuvlarini amalga oshirayotganlarga murojaat qildi

Transport vazirligi xalqaro yuk tashuvlarini amalga oshirayotgan milliy tashuvchilarga murojaat qildi. 

Qayd etilishicha, Litva transport xavfsizligi ma’muriyati (LTSA),  mamlakat politsiyasi, bojxona xizmati hamda davlat chegaralarini himoya qilish xizmati (SBGS) Latviya chegarasidagi Salochyay va Smeline Kalvariya chegara nazorat punktlarida uchinchi mamlakat tashuvchilari ustidan kuchaytirilgan nazorat tadbirlarini olib bormoqda. 

Rasmiylar uchinchi mamlakatlarda ro‘yxatdan o‘tgan transport vositalarida Litva orqali o‘tish uchun zarur ruxsatnomalar mavjudligini tekshirmoqda. Xususan, reyd tadbirlari davomida xodimlar qalbakilashtirishga qarshi kurashning turli usullaridan foydalangan holda ruxsatnomalarning soxtaligi va haqiqiyligini, ularning to‘g‘ri to‘ldirilganini nazoratga oladi.    

Qoidabuzarlik holati aniqlangan transport vositasining harakatlanishi taqiqlandi, uning haydovchisi esa ma’muriy javobgarlikka tortiladi.

Milliy tashuvchilardan xalqaro yuk tashuvlarini amalga oshirish jarayonida tegishli hujjatlarning to‘liq holatda bo‘lishi va zarur ma’lumotlarning to‘g‘ri to‘ldirilishiga ahamiyat berish so‘raldi.