Olimpiada mojaro bilan boshlandi. Argentinaning Marokash darvozasiga urgan goli 2 soatdan so‘ng bekor qilindi

Parij Olimpiadasida Argentina va Marokash terma jamoalari o‘rtasidagi o‘yin tribunadagi tartibsizliklar tufayli bir muddatga to‘xtatildi.

Argentina va Marokash futbol turnirining birinchi turi doirasida o‘zaro to‘qnash keldi.

Ikkinchi bo‘limning 15-qo‘shib berilgan daqiqasida argetinaliklar hisobni tenglashtirdi (2:2), biroq hakam Glenn Nyuberg videotakrorni ko‘rish uchun VARga murojaat qilgan.

Bu vaqtda esa tribunada tartibsizliklar boshlangan va hakam jamoalarni kiyim almashtirish xonasiga ketishini so‘ragan. Shundan so‘ng tomoshabinlar stadionni tark etgan. 

Toshkent vaqti bilan 18:00 da boshlangan uchrashuv oradan 22:00 gacha to‘xtab turgan. O‘yin to‘xtatilganidan 2 soat vaqt o‘tgach, hakam uchrashuvni davom ettirgan va bo‘sh stadionda VARni ko‘rib chiqqan. Natijada argentinaliklarning goli bekor qilindi va 2:1 hisobida mag‘lubiyatga uchradi.