AQSH prezidenti Jo Bayden saylovdan nomzodini olib tashlaganidan keyin ilk bor ommaga ko‘rinish berdi. Bu haqda Independent ma’lum qildi.
Baydenning shifokori Kevin O’Konnor prezident allaqachon koronavirusga manfiy test topshirganini aytdi. Shunga qaramay AQSH prezidenti nazorat ostida qolishi ta’kidlandi. Oq uy matbuot xizmatiga ko‘ra, Bayden Delaver shtatida izolyatsiyadan so‘ng ish joyiga qaytadi. Mahalliy telekanallar AQSH prezidenti samolyotga chiqqanini tasvirga olgan.
The Washington Post nashrining yozishicha, Bayden 24-iyul kuni Oq uyda nutq so‘zlashi kerak. U prezidentlik poygasidan chiqishga qaror qilganini aytadi va amerikaliklarga bu lavozimdagi faoliyatini qanday yakunlashni rejalashtirayotganini ma’lum qiladi.
Eslatib o‘tamiz, o‘tgan hafta AQSH prezidenti Jo Bayden COVID-19 uchun ijobiy test topshirgandi. Shundan so‘ng siyosatchi Delaverga izolyatsiyaga ketgan.
Bayden saylovda qatnashmaydi
21-iyul kuni Jo Bayden prezidentlik saylovidan o‘z nomzodini qaytarib oldi. Siyosatchi partiya va mamlakat manfaatlariga asosan shunday qarorga kelganini aytdi.
“Sizning prezidentingiz sifatida xizmat qilish hayotimdagi eng katta sharaf bo‘ldi. Men qayta saylanish niyatida bo‘lgan bo‘lsam-da, o‘z partiyam va mamlakatim manfaatlariga ko‘ra, nomzodimni rad etishim va qolgan muddat davomida faqat prezidentlik vazifamni bajarishga e’tibor qaratishim kerak deb hisoblayman”, degan u.
Bayden prezidentlik poygasida Kamala Harrisni to‘liq qo‘llab-quvvatlashini bildirdi. Uning ta’kidlashicha, demokratlar Trampni saylovlarda mag‘lub etish uchun hozir birlashishi kerak.
AQSH Kongressi Vakillar palatasi spikeri Mayk Jonson qaror ortidan Baydenni iste’foga chiqishga chaqirdi. Uning fikricha, keyingi muddatga prezident bo‘lishni istamagan odam hozir bu lavozimni egallamasligi lozim.
Izoh (0)