Prezidentning “2024/2025-o‘quv yili uchun davlat oliy taʼlim muassasalariga o‘qishga qabul qilishning davlat buyurtmasi parametrlari to‘g‘risida”gi farmoyishi qabul qilindi. Bu haqda O‘zA xabar berdi.
Unga ko‘ra, endilikda davlat oliy taʼlim muassasalariga kirishda to‘plagan baliga nisbatan maʼlum miqdordagi qo‘shimcha ball beriladigan shakldagi imtiyozga ega abituriyentlar 2024/2025-o‘quv yilida tanlagan taʼlim yo‘nalishi bo‘yicha belgilangan o‘tish bali va undan yuqori ball to‘plagan taqdirda, to‘plagan baliga mos ravishda davlat granti yoki to‘lov-kontrakt asosida qo‘shimcha kvota bilan talabalikka tavsiya etiladi.
Huquqshunos Xushnudbek Xudoyberdiyev ushbu o‘zgarish bo‘yicha tushuntirish berdi. Uning yozishicha, endilikda qo‘shimcha ball beriladigan imtiyozlar, eng asosiysi Temurbeklar maktabi bitiruvchilari agar o‘tish bali uchun yetarli ball to‘play olsa, unda ular uchun qo‘shimcha kvota ajratiladi.
“Bunda oldindan qo‘shimcha kvota soni maʼlum qilinmaydi, chunki necha nafar bitiruvchi o‘qishga kira olishi oldindan maʼlum bo‘lmaydi. Mandatdan keyin imtiyozlilarga nechta grant yoki nechta kontrakt ajratilishi aniq bo‘ladi.
Eng muhimi, endi Temurbeklar maktabi bitiruvchilari boshqalarga xalaqit bermaydi. Nihoyat bizni eshitishdi, rahmat”, – deb yozadi Xushnudbek Xudoyberdiyev.
Izoh (0)