Toshkent viloyatida 1 mlrd so‘mdan ortiq kredit mablag‘larini talon-toroj qilish holati aniqlandi

Toshkent viloyatining Bekobod tumanida kredit mablag‘larini talon-toroj qilish holati aniqlandi.

Prezident qarori doirasida Bekobod tumanidagi AT banki tomonidan chorvachilik yo‘nalishida ajratilgan kredit mablag‘larining maqsadli sarflanishi yuzasidan tekshiruv tadbirlari o‘tkazildi.

Unda Bekobod tumanidagi sut va sut mahsulotlari yetishtirish hamda naslli chorva mollarni ko‘paytirish bilan shug‘ullanuvchi “B.F.” MCHJga Avstriyadan 65 bosh naslli, yirik shoxli chorva mollari olib kelish maqsadida 2020-yilda bank tomonidan 7 yil muddatga 2 yil imtiyozli davr bilan yillik 19 foiz ustama to‘lash, shundan 3 foizini hukumat huzuridagi Tadbirkorlik faoliyatini rivojlantirishni qo‘llab-quvvatlash davlat jamg‘armasi hisobidan qoplab berish sharti bilan 1 mlrd 680 mln so‘m kredit mablag‘lari ajratilgan. 

Shuningdek, hukumat qarori bilan tasdiqlangan nizomga asosan, xorijdan keltirilgan chorva mollari uchun 116 mln so‘mlik subsidiya ham ajratilgan.

Ammo, MCHJ tomonidan bankka taqdim qilingan biznes rejada ko‘rsatilgan sut mahsulotlari yetishtirish va naslli mollarni ko‘paytirish, ularni ikki avlod olgungacha saqlash bilan bog‘liq ishlar amalga oshirilmagan. Aksincha, 44 bosh naslli, yirik shoxli chorva mollari naqd pulga sotib yuborilgan. 

Buning natijasida 1 mlrd 82 mln so‘mlik kredit mablag‘lari talon-toroj qilingan.
 
Ajratilgan kredit mablag‘larining maqsadli sarflanishi yuzasidan bank tomonidan kerakli darajada monitoring ishlari olib borilmagan.

Hozirda holat yuzasidan MCHJ mansabdor shaxslariga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi hamda 19211-moddasi 2-qismi “a” bandi bilan, bank mansabdorlariga nibatan esa Jinoyat kodeksining 207-moddasi (mansabga sovuqqonlik bilan qarash) 1-qismi bilan jinoyat ishi qo‘zg‘atilib, tergov harakatlari olib borilmoqda.