Angliya terma jamoasi va “Real” klubi yarim himoyachisi Jud Bellingem yelkasidan qilinishi kerak bo‘lgan operatsiya tufayli 2024—2025-yilgi mavsum boshini o‘tkazib yuborishi mumkin. Bu haqda The Athletic nashriga tayanib Madrid Zone xabar berdi.
Manbaga ko‘ra, “qirollik klubi” rahbariyati yarim himoyachi madridliklar jamoasining muhim o‘yinlarini o‘tkazib yubormaslik va Yevro—2024 ga borish uchun o‘tgan mavsumda qilinishi kerak bo‘lgan jarrohlik amaliyotini kechiktirganidan xabardor. Ta’kidlanishicha, Bellingemning operatsiyadan keyingi tiklanish davri ikki oydan uch oygacha davom etadi.
Bellingem 2023-yilning yozidan buyon “Real”da o‘ynamoqda. Bungacha angliyalik yarim himoyachi Dortmundning “Borussiya” klubi sharafini himoya qilgan. O‘tgan mavsum oxirida hujumkor yarim himoyachi “Los Blankos”dagi debyut mavsumida 42 ta o‘yin o‘tkazib, 23 ta gol va 13 ta golli uzatmani amalga oshirgan edi. Yevro—2024 da futbolchi Angliya terma jamoasining barcha yetti o‘yinida maydonga tushib, ikkita gol va bitta golli uzatmani amalga oshirdi. Transfermarkt internet portaliga ko‘ra futbolchining taxminiy narxi 180 million yevroni tashkil qiladi.
Izoh (0)