Vazirlar Mahkamasining “Oliy taʼlim tashkilotlari rahbarlari va pedagoglarini qayta tayyorlash va malakasini oshirish tizimini samarali tashkil etish chora-tadbirlari to‘g‘risida”gi qarori qabul qilindi, deb xabar beradi Norma.
Prezident qarori bilan Bosh ilmiy-metodik markaz Oliy taʼlim, fan va innovatsiyalar vazirligi huzuridagi Oliy taʼlim tizimi pedagog va rahbar kadrlarini qayta tayyorlash va ularning malakasini oshirish instituti deb qayta nomlandi.
Hujjat bilan institutning asosiy vazifalari belgilandi:
- rahbar va pedagoglarni qayta tayyorlash va malakasini oshirish bo‘yicha oliy taʼlim tashkilotlarining tashkiliy-metodik faoliyatini muvofiqlashtirish;
- oliy taʼlim tashkilotlari va akademik litseylar rahbarlari va pedagog kadrlarining malaka oshirish kurslarini tashkil etish;
- rahbar va pedagoglarning kasbiy bilim, ko‘nikma va malakalarini doimiy takomillashtirish mexanizmlarini joriy etish;
- doktorantura yo‘nalishlari bo‘yicha yuqori malakali ilmiy va ilmiy-pedagog kadrlar tayyorlash;
- qayta tayyorlash va malaka oshirish kurslarida taʼlim jarayonining sifati va samaradorligini tizimli tahlil qilish va monitoring qilish bo‘yicha raqamli axborot tizimlarini ishlab chiqish va joriy etish;
- ilg‘or xorijiy tajriba asosida o‘quv rejalari va taʼlim dasturlarini ishlab chiqish;
- ilmiy faoliyatga, ilg‘or pedagogik tajriba almashishga yuqori malakali xorijiy mutaxassislarni jalb etish.
Institutning tashkiliy tuzilmasi tasdiqlandi. Bundan tashqari, vazirlik tashabbusi bilan O‘zbekiston davlat jahon tillari universiteti qoshida pedagoglarni qayta tayyorlash va malakasini oshirish tarmoq markazi ham tashkil etiladi.
2024/2025-o‘quv yilidan boshlab markazda pedagoglar uchun “Filologiya va tillarni o‘rganish”, “Xorijiy til va adabiyot”, “Tarjima nazariyasi va amaliyoti” mutaxassisliklari bo‘yicha malaka oshirish kurslari tashkil etiladi.
Hujjat Qonun hujjatlari maʼlumotlari milliy bazasida davlat tilida eʼlon qilingan va 2024-yil 12-iyuldan kuchga kirgan.
Avvalroq “Koreya xalqaro hamkorlik agentligi (KOICA) granti asosida milliy texnik malakani baholash va malaka oshirish markazi faoliyatini tashkil etish chora-tadbirlari to‘g‘risida”gi Vazirlar Mahkamasi qarori qabul qilingani to‘g‘risida xabar berilgandi.
Izoh (0)