Jizzax viloyati Zomin tumani hududida ayiq ikki nafar fuqaroning umriga zomin bo‘lgani hamda ayiq ovchilar tomonidan o‘ldirilgani haqida xabar tarqaldi. Viloyat ekologiya boshqarmasi ushbu xabar yolg‘onligini bildirdi.
Ma’lum qilinishicha, ijtimoiy tarmoqlarda shov-shuvlarga sabab bo‘layotgan ushbu holat aslida Rossiyaning Baykalorti o‘lkasida sodir bo‘lgani aniqlandi. Bu haqida Rossiya Federatsiyasi Amur viloyatining Hayvonot dunyosini muhofaza qilish boshqarmasi mas’ul xodimlari tomonidan rasmiy munosabat bildirilgan.
Jizzax viloyati Ekologiya boshqarmasi fuqarolardan bu kabi noto‘g‘ri ma’lumotlarga ishonmaslikni so‘radi va qonunchilikda yolg‘on xabarlar tarqatgan shaxslar javobgarlikka tortilishi mumkinligini eslatib o‘tdi.
Shu yilning aprel oyida Zomin tog‘-o‘rmon davlat qo‘riqxonasidan ayiq qochib ketgani haqidagi xabarlar tarqalgandi. Ekologiya boshqarmasi tarqalgan xabar yolg‘on ekanini maʼlum qilib, aholidan ortiqcha xavotirga tushmaslikni so‘ragandi.
O‘sha oyning o‘rtalarida Jizzaxda aholi yashaydigan qishloqqa ayiq tushib kelgandi. U mahalla aholisi, xonadonlar va chorva mollariga zarar yetkazmagan.
Izoh (0)