Xitoy va Rossiya dengiz kuchlari iyul oyi boshidan beri Janubiy Xitoy dengizida harbiy mashg‘ulotlar o‘tkazmoqda. Bu haqda Xitoy Mudofaa vazirligi bayonotiga asoslanib, Anadolu nashri xabar berdi.
Vazirlikning yozma bayonotida aytilishicha, “Qo‘shma dengiz mashqlari-2024” doirasidagi manyovrlar Xitoy janubidagi Guangdong provinsiyasi yaqinida amalga oshirilmoqda. Ushbu provinsiyaning dengizga tutash Chjanjiang hududida ulkan dengiz va havo kuchlari kontingenti to‘plangan.
Mashg‘ulotlar yillik harbiy mashg‘ulotlar rejasi va ikki qurolli kuch o‘rtasidagi o‘zaro kelishuvga muvofiq amalga oshirilayotgani xabar qilingan. Rossiya harbiy maʼmuriyati ham ushbu xabarni tasdiqlagan.
Davom etayotgan manyovrlar dengiz xavfsizligi muammolarini birgalikda hal qilish hamda global va mintaqaviy tinchlik va barqarorlikni qo‘llab-quvvatlashda ikki tomonning qatʼiyati va imkoniyatlarini namoyish etishdan iborat ekanligi xabar qilingan. Janubiy Xitoy dengizida qo‘shma mashg‘ulotlar borishi raqib davlatlar uchun dengizdagi harakatlarni qayta ko‘rib chiqish uchun signal bo‘lishi aytilgan.
Yaponiya ikki davlatning dengizdagi mashqlari yuzasidan jiddiy xavotirlarini bildirgan. Sharqiy Osiyo suvlaridagi har qanday harbiy harakat qo‘shni davlatlar uchun tahdid ekani bildirilgan.
Xitoy va Rossiya o‘rtasidagi qo‘shma mashg‘ulotlar dasturi ular o‘rtasidagi strategik hamkorlikning yorqin namoyishi ekanligi aytilgan. Tahlilchilar so‘nggi manyovrlarni AQSHning hududdagi harbiy ishtiroki kuchayishiga javob sifatida baholashgan.
Izoh (0)