O‘zbekistonda dam olish kunlari yomg‘ir yog‘ishi kutilmoqda

Dam olish kunlari O‘zbekistonga Volgabo‘yi hududlaridan nisbatan salqin va nam havo kirib kelishi kutilmoqda, deb xabar berdi “O‘zgidromet”.

13-iyul, shanba kuni kechasi va ertalab Toshkent viloyati va Farg‘ona vodiysi viloyatlarida baʼzi joylarda biroz yomg‘ir yog‘ishi mumkin. Shuningdek, Ustyurt hududlari bo‘yicha qisqa muddatli yomg‘ir yog‘ishi mumkin.

14-iyul, yakshanba kuni Qoraqalpog‘iston Respublikasi, Xorazm, Toshkent, Sirdaryo viloyatlari va Farg‘ona vodiysi viloyatlarida qisqa muddatli yomg‘ir yog‘ishi va momaqaldiroq bo‘lishi kutilmoqda. Shuningdek, ayrim tog‘oldi va tog‘li hududlarda qisqa muddatli yomg‘ir yog‘adi va momaqaldiroq bo‘ladi. Respublikaning qolgan hududlarida dam olish kunlari yog‘ingarchilik kutilmaydi.

Havo harorati 13—14-iyul kunlari 30-35 darajagacha, janubda 36-39 darajagacha pasayadi.

Shamol 7-12 metr/sekund tezlikda esadi, baʼzi joylarda 13-18 metr/sekundgacha kuchayadi, ayrim joylarda baʼzida 18-23 metr/sekundgacha kuchayishi, chang-to‘zon bilan kuzatilishi mumkin.

Toshkentda 13-iyulda kechasi va ertalab shahar bo‘yicha baʼzi joylarda biroz qisqa muddatli yomg‘ir yog‘ishi, momaqaldiroq bo‘lishi mumkin. Yakshanba, 14-iyul kuni ham qisqa muddatli yomg‘ir yog‘ishi, momaqaldiroq bo‘lishi ehtimoli bor. Dam olish kunlari harorat 32-34 daraja bo‘ladi.