O‘zbekiston 2023-yilning so‘nggida Qozog‘istonga so‘nggi 18 yildagi eng yirik sarmoya kiritgan. Bu haqda “Zakon.kz” manbasi xabar berdi.
Manbada aytilishicha, O‘zbekistondan Qozog‘istonga kiritilgan to‘g‘ridan to‘g‘ri investitsiyalar hajmi 2023-yil oxirida rekord darajadagi 22,2 million dollarga yetgan. Bu 2005-yil yakunidan beri qayd etilgan eng katta statistika hisoblanadi.
O‘tgan yili Qozog‘iston va O‘zbekiston bir qancha muhim loyihalarni amalga oshirgan. Jumladan, Qo‘stanay viloyatida Chevrolet Onix avtomobillarini ishlab chiqarish yo‘lga qo‘yilgan. Olmaota viloyatida metall prokat ishlab chiqaruvchi zavod qurilgan. Chimkentda steril dori shakllari va gigiyena vositalari ishlab chiqarish platformasi tashkil etilgan.
O‘zbekistondan investitsiya takliflari oshishi Qozog‘istondagi biznes muhiti bilan bog‘liq ekani xabar qilingan. Qo‘shni mamlakatda biznes yuritish, investorlar huquqlarini samarali himoya qilish va investitsiyalarni rag‘batlantirish uchun nihoyatda qulay shart-sharoitlarni yaratilgani taʼkidlangan.
Toshkent va Ostona hukumatlari o‘zaro hamkorlikni yangi jabhaga ko‘tarish bo‘yicha umumiy dasturga ega. Mamlakatlar yaqin kelajakda o‘zaro tovar ayirboshlash hajmini 10 milliard dollarga yetkazish va ishbilarmonlik aloqalarini kengaytirishga kelishib olishgan.
Avvalroq O‘zbekiston Qozog‘istonda ro‘yxatdan o‘tgan kompaniyalar soni bo‘yicha Xitoyni ortda qoldirib, uchinchi yirik xorijiy investorga aylangani xabar qilingan edi. Ushbu statistika ham Qozog‘iston uchun O‘zbekiston potensial hamkor ekanini ko‘rsatadi.
“Mingdan ortiq qo‘shma korxonamiz bor, bu juda yaxshi. O‘z mahsulotlarini Yevroosiyo iqtisodiy ittifoqi mamlakatlariga eksport qilishga intilayotgan o‘zbekistonlik tadbirkorlar ko‘pincha Qozog‘istonni qulay baza sifatida tanlaydi. Ayni paytda qozog‘istonlik tadbirkorlar O‘zbekistonga faol sarmoya kiritmoqda. Buni chuqurroq o‘rgana boshlasak, bu kompaniyalarning ko‘pchiligi Qozog‘iston kapitali va investitsiyalariga asoslangani maʼlum bo‘ladi, bu esa ish o‘rinlari yaratilishiga va mahalliy vakolatlarning rivojlanishiga olib keldi. Bu har ikki davlat uchun juda muhim va foydalidir va biz o‘zaro manfaatli hamkorlikni davom ettirishimiz kerak, deb hisoblayman”, — degan holatga munosabat bildirgan Qozog‘iston hukumatining O‘zbekistondagi elchisi Beybut Atamqulov
Izoh (0)