Braziliyada politsiyachi futbol uchrashuvida darvozabonga o‘q uzdi (video)

Braziliyaning “Gremio Anapolis” futbol klubi darvozaboni o‘yindan keyingi mushtlashuv vaqtida jarohat oldi: politsiyachilardan biri futbolchining oyog‘iga o‘q uzdi. Bu haqda O Globo nashri xabar berdi.

Hodisa chempionatning 12-tur o‘yinida yuz berdi, unda “Gremio Anapolis” “Sentro Oeste” klubini qabul qildi (1:2). Final hushtagi yangraganidan so‘ng, stadion chetida har ikki klub futbolchilari o‘rtasida mushtlashuv kelib chiqdi va politsiya ularni tarqatib yuborish uchun aralashishga majbur bo‘ldi. Politsiya xodimlaridan biri travmatik quroldan o‘q uzdi, oqibatda rezina o‘q mezbonlar darvozaboni Ramon Souzaning oyog‘iga tegdi.

Shifokorlar darvozabonga maydondayoq birinchi tibbiy yordam ko‘rsatgan, shundan keyin u kasalxonaga yotqizilgan.
Klub qurol ishlatishni “hech qachon unutilmaydigan shafqatsiz, iflos va jirkanch harakat” deb atadi. Klub, “aybdorlar jazolanishi va adolat o‘rnatilishi” uchun barcha choralarni ko‘rishga va’da berdi.

Goyas shtati politsiyasi, o‘z navbatida, voqea bo‘yicha zudlik bilan tergov boshlanganini e’lon qildi. Rasmiylar, shuningdek, o‘z xodimlari tomonidan sodir etilgan noqonuniy xatti-harakatlarni oqlab bo‘lmasligini ta’kidladi.